«Слово» – Неділя блудного сына – неділя, 9.00 год.

Другов недільов приготовляючов нас до часу посту є Неділа блудного сына. Отець, котрый мать двох сынів. Єдного разу молодшый говорить отцьови: Дай мі частку із маєтку, котра мі належыть. Дітолюбный отець їм розділив маєток.

Молодшый занедовга одышов із вшыткым, што набыв од отця до далекого края і там вшытко прогайновав, жыючі вольным, невязаным жывотом. Тот образный приклад вказує нам, же чоловік быв сотвореный про Бога, жебы быв із ним. Образ молодшого сына – образ бунту чоловіка проти Божой авторіты. Не хотів быти обмедженый ниякыма заповідями, приказами ці заказами. Хотів жыти в свободі. Прото одходить од Бога. Но чоловік не може місцьом одыйти од Бога хоцьяк бы то хотів, бо Бог є всядыль. Але одышов через нерешпеткованя Божых заповідей, через забытя на Бога. Теперь ся чув свободным, необмеджованым.

На тото нас нагварять діавол через духа того світа. Барз часто чуєме о лібералізмі – то є прягнутю быти слободным. Но свобода, котра ся нам нукать є фалшыва свобода, є то свобода без Бога. А насправды є до рабства. Тото спознав і тот молодшый сын, котрый ся спамятав, кедь о вшытко пришов і зачав терпіти голод і бідовати. Зазнавав язвы діавола із каждого боку. Прото євангеліє го называть – блудный сын – ґр. aсотос, то є неспасеный, незахраненый. Якбы выставленый на розмаїты трапліня і раны із боку неприятелів. Но тот сын собі говорить: Верну ся. Хоць єм недостойный называти ся веце його сыном. Но може хоць лем за наємника ня прийме. А отець? Вызерать го каждый день, сам прибігнув ку ньому, кедь го збачів здалека, приїмать го назад, не вытыкать. Але вертать му перше облечіня – знак достоїнства, же є і надалше сыном, і наслідником.

Днешнє євангелїє і нам говорить, же лем в жывоті з Богом, подля його заповідей, є чоловік правдиво свободный і справды щастливый. Не дайме ся збаламутити тому покушіню лібералізма. Но ай кідь чоловік зробить подобно як блудный сын, покля сьме на землі, не маме пропадати отчаянїю, безнадійности. Но приходьме ку люблячому Богу а і мы втогды учуєме: Дайте му перше облечіня, будеме радовати ся, тот сын быв мертвый і ожыв, стратив і нашов ся. Слава Ісусу Хрісту!

В неділю,  24. фебруара 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 24. фебруара 15.00 і 20.00 год. і 25. фебруара о 2.00, год. за русиньскым часом.

фото: Навернутя блудного сына, Рембранд 1636 р. Жрідло: wikipedia

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА