«Слово» – Неділя мясопустна – неділя, 9.00 год.

Третя неділя, котра нас приготовлять до часу Святой штиридцятниці, є неділя мясопустна, або тыж і неділя страшного суду. Свою назву мать од того, же тов недільов ся в переставало їсти мясо аж до пасхы.

А неділя страшного суду зясь подля днешнього євангелія, котре говорить о другім приході Хріста. Кедь сын чоловіка прийде у своїй славі зо вшыткыма ангелами, тогды засяде на престол свойой славы. Зыйдуть ся перед нього вшыткы народы. І будуть одділены єдны од другых. Праведны на праву сторону, а грішникы на ліву сторону.

Днешнє слово нас кличе ку одповіді. Дайме собі вопрос: Як реаґує тот світ на днешнє євангеліє? Многы сміють ся з того. Не вірять, же буде даякый страшный суд. Много раз ці таке ся не діє і в нашім жывоті хрістіаньскім? Коли ставиме матеріалне на перше місце, або гріх ці роскош, та ці тым не декларуєме, же собі нич не робиме з тых слов рахунку. Бог нам дав слободну волю. Чоловік може робити, што лем хоче. Добро і зло.

І апостол Павел нам то говорить: Вшытко можу, але додав: но не вшытко є на хосен. Кажде слово, діло ці думка, несе зо собов одповідность і наслідок. Раз буде треба давати рахунок. А тото нам припоминать днешнє слово. Ісус Хрістос, коли говорив о своїм ппиході а як Бог видів і невіру в сердцях людей, выхосновав подію зо старого завіта о Нойови.

Так, як было за часів Ноя, буде і при приході Сына чоловіка. Як тогды люде їли, пили, женили ся і оодавали. Но лем до дня вступу Ноя до корабля. І Додав: І пришла потопа і вшыткых взяла. Ной увірив Богу. Хоць люде сміяли ся з нього. А на їх стороні быв і доказ, так не было ниякого назнаку, ани хмаркы на небі, же дашто ся може таке стати. Ной не брав на них огляд. Знав, Бог повів, увірив Божому слову. А стало ся так, як Бог повів.

І мы сьме конфронтованы з духом того світа, котрый ся нам высмівать. Но не смотьме на то. Але приймийме тото днешнє слово, выхоснуйме каждый день нашого жывота, на покаяня за нашы гріхы, щіру молитву, милостыню, робліня добра.

Жебы як прийде Господь, і мы сьме могли вєдно з выбранами учути: Подьте благословлены і наслідуйте Царьство вам приготовлене о сотворіня світа. Слава Ісусу Хрісту!

В неділю, 19. фебруара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. фебруара 2023 р. о 12.00 год. і 20. фебруара 2023 р. о 2.00 год. за русиньскым часом.