Голосник

«Слово» – Неділя мясопустна – неділя, 9.00 год.

Неділя мясопустна або Неділя Страшного суду може выкликати страх, коли чуєме днешнє слово Євангелія. Ісус в нім говорить о своїм другім приході.

Но тото не є цільом того слова. Якраз навспак, цільом є повзбудити ку выповніню крітерій, на основі котрого буде Ісус выношати суд при другім приході. Тым крітерійом є любов. Бо говорить: Я быв голоден, затлітый, нагый, хворый у вязніці… А єдным повість – вы сьте мі послужыли, а тым другым – вы сьте мі не послужыли. А кедь будуть ся єдны і другы оправдовати, коли мали можность тото зробити, Ісус повість: Што вы зробили єдному з моїх найменшых братів – то вы зробили мі. А ку другым, же то вы не зробили ани мі.

Видиме, же там уж оправданя не мать місце. Ту є тот час Богом даный, котрый можеме выхосновати, жебы жыти так, як Бог од нас хоче. Жыти в любви ку Богу і ближньому, жебы належати ку Його выбраным а раз учути тоты блажены слова: Наслідуйте царьство на вічны вікы – оно є про вас приготовлене. А жебы не чути тоты страшны слова: Ідьте до огня вічного – приготовленого діяволу і його ангелам.

Видиме, же Ісус ту лем потверджує суд. То, што собі чоловік выволить на землі. Не про чоловіка было сотворене пекло і вічны мукы, але про діявола. Послухайме так доброго Бога, котрый нам приготовив такы блага, а то на цілу вічность. Не слухайме тот світ, котрый ся высмівать з Бога, з Його слова, зо Страшного суду, жебы оправдати перед собов жывот в гріхах і роскошах. Тото вшытко скоро помине. А Хрістово слово ся наповнить. Де будуть потім высмівателі, котры теперь ся выношайуть над Бога?

Не на них смотьме, але слухайме нашого Спасителя, жебы потім учути: Подьте благословлены до мойого і вашого царьства. Слава Ісусу Хрісту!

В неділю,  23. лютого/фебруара 2020 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 23. лютого/фебруара о 12.00 год. і 24. лютого/фебруара о 2.00, год. за русиньскым часом.

Фотоґрафія: Страшный суд, церьков Воронець на Буковині. Жрідло: wikipedia

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Avatar

Коментарі