«Слово» – Неділя праотців – неділя, 9.00 год.

Днешня неділя называть ся Недільов праотців. Свята Церьков нам предствалять євангеліє о запрошіню на гостину. Ісус говорить образный приклад о чоловікови, котрый приготовив велику гостину і запросив многых.

Як было вшытко готове, втогды послав повісти запрошеным: Подьте, вшытко готове. Но они зачали ся выгваряти, єден купив поле, другый волы, третій оженив ся. І втогды пан дому повів: Закличте бідных, хромых і калікы. І з тых запрошеных нихто не окусить із вечері. Много званых но мало выбраных. Тот образный приклад говорить о Божім запрошіню выбраного народа. Многы святы Старого завіта одповіли на тото запрошіня. Авраам, Ной, Мойсей, пророкы і далшы. Бог позывать до свойого царьства. Чоловік може одповісти віров наслідуючі приклад віры праотців, або зачінать ся выгваряти. Не мать час на Бога, на молитву, на бессмертну душу, на вічность. Хоче жыти лем про земне. Яка є наша одповідь? Най віра св. праотців Старого завіта помагать і нам одповісти віров на Боже запрошіня. Слава Ісусу Хрісту!