Слово – Неділя праотців. О вірі а вірности святых праотців Старого завіта – неділя, 09.00 год.

Послідньов недільов перед праздником Рождества є Неділя святых Отців. Євангеліє нам вказує на великый список імен од Авраама по Йосифа. Были меджі нима справедливы і грішникы.

Тот список євангеліста зачінать од Давіда, козтрого мали вшыткы на устах. З роду Давіда очековали обіцяного Спасителя. Фарізеї і учітеля закона, коли ся перечіли з Ісусом, часто арґументовали тым, же Месія прийде не із Назарета, но з Давідового міста Віфлеєма. Прото і св. Мафтей кладе Давіда перед Авраама. Потім ся вертать ку Авраамови і продовжує по вавілоньске рабство а потім аж ку Йосифови. Кедьже Йосиф быв справедливый, дотримовав заповіді і закон. Тыж і то, жебы сі не взяв за жену з іншого роду як із роду Давіда. Прото є тот список імен не лем родословом Йосифа, но і Марії а тым і самого Ісуса.

Друга частина євангелія нам говорить о Йосифови, котрый хотів тайно пропустити Марію, коли ся дізнав, же чекать дітину. Не хотів єй дати знечестити, но тайно єй пропустити. Но ангел у сні му звістує: Не бій ся прияти Марію, свою жену. Св. Йоан Златоустый ся звідує: Де єй мав прияти, кедь жыла в його домі? Прияти до свого сердця. Бо і кедь были під єднов стріхов, была про нього чуджов. Похыбности в його внутрі выбудовали тот мур розділіня. Ангел го заспокоює: Не бій ся прияти Марію. А Йосиф так зробив. Послухав божый голос.

Гріх робить мур розділіня, котрый Божый Сын пришов розрушыти. Днешнє слово і нам говорить: Не бій ся прияти. Може і ку нам ся односить тото слово в одношіню ку Богу, ці в одношіню в родині меджі мужом і женов, меджі родічами і дітьми, ці меджі сусідами. Ту звучіть тото слово: Не бій ся прияти. Не бій ся доволити Богу, жебы і в твоїм жывоті розваляв тот мур гріха, нелюбви, незлагоды. Лем так будуть про нас тоты надходячі святкы хосенны не лем про тіло, но головно про нашу душу. Слава Ісусу Хрісту!

В неділю, 5. січня/януара 2020 р., о 9.00 год. проґрам єромонаха Маркіяна (ЧСВВ) пн.: «Слово». Повторіня 5. січня/януара, о 12.00 і 6. січня/януара, о 2.00 год. за русиньскым часом.

фото горі:  Дерево Єсея

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА