«Слово» – Неділя Самаріянкы – неділя, 9.00 год.
Ісус Хрістос приходить до Самарії ку місту Сіхарь, де была Яковова студня. Было коло 6-ой годины (нашой 12-той на обід). Ісус страпленый по дорозі, жебы указати і свою людьску природу, сів собі коло жрідла.
Приходить жена начерьпати воды, Ісус їй говорить: Дай мі пити. Она не розуміє, бо Жыде не сходили ся із Самаріянами, як може просити од ньой самаріяньской жены. Но на одповідь Ісуса, же кебы она знала, хто є просячій, і же може він єй дати воду жыву, котра є інша як тота, што є в тій студні, од тамтой не буде уж никого тлоїти, жена роздумує о тім, же Ісус мать даяке інше жрідло. Не знать, же Він говорить о духовній воді. І просить: Дай мі той воды, жебы я уж не была ниґда веце затліта, і не мусила ту приходити. Потім одкрывать тайну їй жывота, вказує на яку воду він думать. Кідь їй говорить, же мала пятьох мужів і жыє теперь із нелеґітімным мужом. Вказує, же она была высушована пожадливостьов, чім веце пила, тым веце была затліта. І кідь їй звістує, же він є тот Месія, што має прийти, она то принимать, увірила його слову а іде звістовати до міста. Подьте видіти чоловіка, котрый мі повів вшытко, што я поробила, ці то не Хрістос?
Затлітость той жены є много раз образом і нашого жывота. Чоловік ся старать загасити внутрішнье тлоїня душі, але тым недобрым средством. Глядать там, де не може прийти поміч. Лем Ісус є одповідьов на прягнутя чоловіка. Кідь буде чоловік глядати в тілесных роскошах, ці в плеонексії (то є жадобi мати все веце) ниґда не загасить тлоїня душі, але іщі веце роспалить. Леm Ісус подає правдиву воду на тото загашіня, воду одпущіня, воду познаня свойого слова. І нам нукать, як тій жені. І чекать тоту одповідь, яку дала она: Господи, дай мі той воды. Дайме і мы тоту одповідь Воскресшому Господу і лем втогды найдеме правдиве щастя ту на землі і у вічности. Хрістос воскрес!
В неділю, 6. мая 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 6. мая о 15.00, 20.00 год. і 7. мая о 2.00, год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Фото: Мануел Панселінос, фреска на горі Афон. Жрідло: Wikipedia.
Повязаны дописы
Ґорлиці 106,6 MHz
