«Слово» – Неділя св. Отців – неділя, 9.00 год.

Днешня неділя называть Недільов святых Отців. Є послідньов пред праздником Рождества Господа нашого Ісуса Хріста. Церьков нам давать чітати довгый список Хрістовых предків.

Може ся нам видить, прошто треба чітати тоты мена? Тадь і так многы не познаме. Но чітаня тых мен мать велике значіня. На початку чуєме слова: Книга поколінь Ісуса Хріста, сына Давідового, сына Авраамового. Двох великых представителів Старого завіта, котрым были даны обіцянкы, якы односять ся ку приходу Спасителя. Кедьже Авраам жыв давніше, а Давід зясь ближе ку часу выповніня тых приобіцянь, быв і частіше на устах Жыдів. Прото і євангеліста Мафтей го кладе перед Авраама, жебы указати, же Хрістос є справды Месія, котрый походить із роду Давіда.

Далше можеме видіти многы мена старозавітных предків Господа. Видиме там і 4 жены, што не было у звычаю Жыдів, жебы давати до родослова і жены, а то іщі дві блудніці, єдну чуджінку і єдну чуджоложніцю. Євангеліста там вкладать і тоты жены, жебы вказати, же Ісус приходить поздвигнути каждого чоловіка – мужа і жену, до великого достоїнства, із котрого чоловік через гріх упав на рівень безсловесных. Бог сходить на землю, стає єдным із нас. Но жебы не подумати, же Хрістос быв лем звычайным чоловіком, хоць посланым од Бога, даякым чудотворцьом ці пророком, євангеліста закінчує днешнє слово о початю із Святого Духа і словами ангела, котрый говорить Йосифови: Не бій ся прияти Марію, свою жену, бо што в ній почало ся, є зо Святого Духа. Породить Сына а даш йому імя Ісус. Він сохранить своїх людей із їх гріхів.

Далше нам днешнє слово вказує, же не треба одкликовати ся на своїх предків, котры жыли свято, добродительно, кедь мы не жыєме подля їх прикладу. Втогды про нас із того не є ниякого хосну. А зясь, не треба ганьбити ся за предків, котры може были і великыма грішниками, кедь мы не наслідуєме їх приклад, не є про нас ниякой шкоды.

І так будьме наповнены вдячностьов нашому Спасительови, котрый із великой любви ку нам про нас став ся чоловіком, приявшый нашу людьску природу, но непереставшый быти Богом, жебы нас зробити участниками свойого божества. Слава Ісусу Хрісту!