«Слово» – Неділя святых жен міроносиць – неділя, 9.00 год.

Пережываме пасхалный час. Церьков є наповнена і в нашыв боголсужінях радостьов з Воскресіня Хріста. Днешню неділю нам указує на жены міроносиці. Чом таку назву дістали тоты побожны жены? Хто были?

Они служыли Хрістови в часі його земного оголошаня Євангелія. Не были в близкости Хріста так, як были апостолы. Они ходили за Ісусом і Його ученикы позаду. Служыли зо свого маєтку, старали ся о потребы Господа і апостолів – їдло, облечіня. Што было треба. Їх робота не была видимов, але не была менше важнішов.

З погляду того світа они нич вылике не робили. Но в тій маленькій роботі, они єй зробили великов через велику любов, котру до ньой давали. Господь видів їх сердця і нагородив уж ту на землі, а што повісти, яку славу неба они зажывають теперь?

Коли Ісус быв розпятый, ученикы ся порозутікали, тоты жены перебывали вєдно з Марійов під крестом. Они здалека смотрили на похованя Ісуса, брали так в дусі непряму участь, коли Йосиф із Нікодімом клали Ісусове тіло до гроба. Они вырішыли по закончіню суботы выбрати ся ку гробу, жебы помазати ароматічныма мастями мертвы тіло. Не знали ани о вояках при гробі. Они бісідують, як они докажуть одвалити камінь, але предці ідуть, любов їх жене. А там чують слова ангела: Тот, котрого глядате як мертвого, Він є жывый, воскрес, не є ту. Звістуйте Його ученикам. Так они ідуть, утікають од гроба звістовати тоту новину апостолам.

Але сам Ісус, хотачі нагородити їх любов, появлять ся їм як першым свідкам воскресіня. Радуйте ся, заспокоює їх знепокоєны сердця, перед тым наповнены жальом і больом. Посылать їх ку ученикам. А так они, котры взяли ароматічны масти, несучі тото міро, теперь несуть жыве Міро – Хріста, ку апостолам а помазують тым міром словами: Хрістос воскрес, не є го в гробі.

І мы наслідуйте тоты побожны жены, приношайме жыве Міро Хріста тому світа і тыма радостныма словами помазуйме каждого, з кым ся стрітиме: Хрістос воскрес!

В неділю, 30. апріля 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. апріля 2023 р. о 12.00 год. і 1. мая 2023 р. о 2.00 год. за русиньскым часом.