«Слово» – Неділя святых жен міроносиць – неділя, 9.00 год.

Церьков нам ставить перед нас приклад тых святых жен, котры служыли Хрістови в часі його земной діялности од Ґалілеї до Юдеї. Но были йому вірны і в часі його страстей.

Коли апостолы аж на Йоана ся порозутікали і были замкнены зо страху перед Жыдами, тоты святы жены, были під крестом. А коли Ісуса поклали до гроба, они ся выбрали ку гробу, жебы ароматами помазати його тіло. По дорозі бісідовали, хто нам одвалить камінь од верей гроба. Ай кедь сітуація была безнадійна, а они самы не могли собі одвалити камінь. А іщі ани не знали о вояках, котры дозерали гроб. Предці їх любов ку Хрістови была векшов. А Ісус одмінив їх любов. При гробі стрічають ангела, котрый їм звістує воскресіня Хріста. А по дорозі сам Господь ся їм появив і звістує їм радость. Не появив ся наперед апостолам, але праві тым женам а посылать їх як звістователькы восресіня ку апостолам.

Ісус видів їх щіру любов. Ай кедь они в часі його діялности не были так близко нього як апостолы, Ісус быв як Бог близко них.

Тоты жены і нас учать быти вірныма Господу не лем втогды, коли нам є добрі, не маме ниякых проблемів ці траплінь, але і втогды, кедь ся нам видить, же Хрістос якбы быв далеко, якбы быв мертвый в нашім жывоті. І втогды, жебы сьме мали тверду віру.

А другым моментом, котрый нам указують тоты жены є, же не важно хто яку роботу робить на тім світі. Може тота робота є з боку того світа, ці близкых ці родины недоцінена. Але коли то робиме із щірой любви, з добрым наміріньом, Бог видить до нашого внутра. А одмінить раз і нас, як одмнив святы міронисиці. Хрістос воскрес!

В неділю, 3. мая 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. мая о 12.00 год. і 4. мая о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА