«Слово» – Неділя сыропустна – неділя, 9.00 год.

Сыропустна неділя є уж послідньов перед вступом до святого часу Великого посту. В тот день пущать ся їджіня сыра, молока і далшых із продуктів звірячого походжіня. Опередньой неділі ся пущало мясо, но через тыждень ся довольовало їсти іщі сыр і далшый набіл.

В середу і пятніцю того тыждня были уж алітурґічны дні, коли ся не служыть Служба Божа, но постны богослужіня з поклонами.

Днешня неділя ся называть і Недільов прощіня – одпущіня. Бо в днешнім слові єванелія нам Господь говорить: Кедь вы одпущате людям їх гріхы, одпустить і вам ваш небесный Отець вашы гріхы. А як вы не одпущате, та ани ваш небесный Отець не одпустить вам вашы гріхы. В молитві Отченаш, котру молиме ся каждого дня, выповідаме слова: І одпусть нам, як і мы одпущаме, а як мы не одпущаме, і кедь ся молиме тоты слова, то якбы сьме Богу говорили: Не одпусть, бо і мы не одпущаме. Прото по монастырях і парохіях є звычай в днешній день просити собі взаємно о одпущіня, жебы так сьме могли без гніву і злопамятства вступити до благодатного часу, в котрім спознаваючі свою грішность, свій много раз бунт проти Бога, будеме просити через щіре покаяна о одпущіня.

Далше нам Ісус говорить, жебы піст не быв про людей, жебы не людям вказовати, же постиме, але в таємности сердця, бо Бог видить і то, што утаєне. Жебы не наподобовати фалшывых фарізеїв, котры ходили захмурены, жебы люде виділи як они постять.

І наконець днешнє слово євангелія нам говорить о важности укладати собі богатство не на землі, але в небі. Не быти привязаны ку тому земному, матеріалному, бо скоро переходить, і молі і гарджа нищать то. В молитві св. Єфрема Сірійского, котра молить ся через піст на нашых богослужінях, чуєме: Господи і Владыко мойого жывота… тыма словами признаваме перед Богом, же Він є справды Господь і Владыка нашого жывота, же Йому належыть перше місце в нашім жывоті і в нашім сердці. Прото далше тота молитва говорить: Дух унынія – духовной ліности, неохоты до молитвы, духовного чітаня, духовных діл; дух недбалства – недбаня о свою душу, неробліня сі старости о спасіня, о суді, небі, о пеклі, жытя лем про земне; дух прягнутя влады, пінязей, славы; дух порожніх, непотрібных слов – просиме, жебы Бог одогнав од нас. Бо оны суть перешкоджіньом тому, жебы Бог быв Владыка і нашого жывота. Бо де є наше богатство, там буде і наше сердце.

Прото выхоснуйме тоты средства, котры ся нам нукають в тім благодатнім часі: піст, молитву, милостыню, жебы добрі пережыти і приготовити ся не лем на тоту земну Пасху, а і нашу вічну, на стрітнутя з Господом у вічности. Слава Ісусу Хрісту!

В неділю,  10. марца 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 10 марца 15.00 і 20.00 год. і 11 марца о 2.00, год. за русиньскым часом.

Фотоґрафія: св. Єфрем Сірійскый. Жрідло: wikipedia