«Слово» – Неділя Томина – неділя, 9.00 год

Світлый тыждень є в нашім літурґічнім жывоті як єден день Пасхы. Через цілый тыждень суть вшыткы двері іконостаса отворены нелем в часі богослужінь але ай мимо них. Двері ся заперають на Світлу суботу.

Отворены двері указують нам на отворене небо, котре Ісус Хрістс своїм воскресіньом отворив про каждого, хто хоче прияти тото позваня і войти. А запертя дверей указує, же раз тот час Божого кликаня закончіть ся.

Уж в передобразах Старого завіта тото можеме видіти. Коли Ной вошов до корабля, Бог запер за ним двері. Подобно Ісус на многых місцях о тім говорить. Коли владыка дому встане і запре двері, будете ся намагати войти, але не будете мочі. Подобно в прикладі о десятьох дівах. Пять мудрых приготовленых, коли пришов жених, вошли з ним а двері ся заперли.

А днешня неділя, котра ся называть і Недільов антіпасхы про невірство єдного із апостолів – Томы, котрый не быв присутный, коли Ісус ся появив апостолам через заперты двері. Дав собі пожадавку: вложыти палець до ран од клинців а руку до його ребра, іншак не увірить. А цілий тыждень Тома быв в темноті невірства. А на восьмый день Ісус пршов такым самым способом. А повів, мір вам, а потім ся обертать ку Томови: зроб, як жадаш, а не будь уж невіруючій, але віруючій. А Тома на то скрикнув: Господь мій і Бог мій.

Ісус тым, же дав йому знати скорше як Тома высловив своє условя віры, пові йому о тім, о чім бісідовав з апостолами: кедь не дам свій палець, а не дам свою руку: Тым йому Ісус повів: Томо, я быв ту невидимо із вами. І все буду невидимо із вами. Указав на Хрістово божество. А потім потверджує віру Томы: Ты єсь уж увірив, є то правда, але лем за то, бо ты єсь ня видів. Но Блажены суть, котры не виділи а увірили.

Господь допустив тото невірство Томы, котре обертать на наш хосен. Жебы уж нихто не падав до похыбованя о воскресіню. Най нас тота невіра Томы і обновліня його віры підкріпить, жебы утвердити нашу віру у воскресіня, жебы стала явнов в нашім жывоті. Жебы сьме так прияли тото позваня Хріста і вошли через отворены двері Царьства, покы суть они отворены. Хрістос воскрес!

В неділю, 23. апріля 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. апріля 2023 р. о 12.00 год. і 24. апріля 2023 р. о 2.00 год. за русиньскым часом.