«Слово» – Праздник Богоявленія – неділя, 9.00 год

Другым великым праздником по Рождестві є Богоявкеніє. Ісус приходить на Йоардан дати ся покрестити. Йоан там крестить і проповідать о Хрістови, котрый приходить. Ісус приходить в тихости.

О Йоанови знав каждый, о Ісусови не знали. Йоан зачудованый, коли Ісус просить крещіня, бо Йоан спознав через Святого Духа, же Ісус є тот, о котрім він говорив. Но Ісус на слова Йоана, же він потребує крещіня одповідать: Зохаб так теперь – на тот час треба так робити, а потім буде і тото, што говориш ты о мі.

Коли Йоан покрестив Ісуса, отворило ся небо, Святый Дух в подобі голуба сходить на Ісуса, а з неба голос: Тото є мій любый Сын, в котрім мам залюбліня. В тім празднику указує ся ціла Свята Тройця. Єден Бог в трьох особах. Отець через голос, Сын як крещеный в Йордані, і Святый Дух в подобві голуба. Голув быв сімболом зміріня, покоя.

В старім завіті мать в дзьобачіку голузку, котра была сімболом закінчіня потопы світа. В новім не голузка, але сам Сын Божый є тот, через котрого прийде спасіня.

Далшый аспект днешнього праздника є крещіня. І мы сьме были покрещены і зазвучав і над тобов голос: Ты моя люба дітина. В крестных обіцянках зрекли ся злого духа і обіцяли вірность Хрістови. Най і тот праздник не буде лем холодным припомянутьом даякой події, але най утвердить і посилнить нашу віру. Жебы сьме мали Господа все перед очами, і жыли в каждій сітуації на Божу славу. Хрістос раждаєт ся!

В неділю, 24. януара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. януара о 12.00 год. і 25. януара о 2.00 год. за русиньскым часом.