«Слово» – Праздник св. Николая Чудотворця – неділя, 9.00 год.

В описі Страшного суду тов крітерійов, на основі котрой єдны чують подьте благословлены, а другы ідьте од мене прокляты, є любов ку Богу і з ньой выходячі діла милосердя ку ближньому.

А якраз тото характерізує великого святителя Николая, архієпіскопа міста Міры. Уж од маленька горить в нім любов ку Богу. Як приїмав материньске молоко, в середы і пятніці то робив лем раз ку вечеру, жебы тым указав уж в такім маленькім віці свою любов ку терплячому Спасительови. Коли підростать, його стрыко Николай, єпіскоп Патары, бере го ку собі і по науці го высвятив на діакона і священика.

А коли одходив до Святой землі, звірив йому цілу єпархію. А святый Николай іщі як священик бере ся запалено до роботы, а коли його стрык ся вернув, с м мав прягнутя навщівіти Святу землю. І там ся зродила думка вступити там до монастыря і жыти лем про Бога. Но чує голос, верний ся на свою отцюзнину. Так вертать і вступив до монастыря, котрый основав його стрык. Но по даякім часі і там чує голос Святого Духа. Коли хочеш одміну од мене, подвижай ся за спасіня людей у світі.

Так одышов до міста Міры, никым незнатый там жыє, но Божім ряджіньом є выбраный на єпіскопа. Видячі в тім Божу волю приїмать тот крест. А говорить собі, уж не в таємности мушу робити добры діла, як то робив як священик, але жебы виділи добры діла люде і прославляли Отця небесного. А Господь наділив його даром творіня чудесных діл. Подавав як духовну милостыню, выкорінюючі гріх, недостаткы меджі священством і вірныма, такк і матеріалну милостыню тым, котры то потребовали.

За імперетаора Діоклетіана быв запертый до вязніці, і там видить Божу волю, же може подавати милостыню духовну тым, котры ся там находили. А по ослободжіню вертать до свойой єпархії. Бере участь і на Нікейскім соборі, де Господь його за його надхненость за Божу славу прославив перед вшыткыма отцями собора. Потім жыє до глубокой старобы в покою а по куртій хвороті переходить по небесну нагороду.

Творив многы чудесны діла нелем за жывота, но і по смерти. Появляв ся на морі і на суші. Подав поміч тым, котры то потребовали. Тым є його посолство і про нас. Жыти любвов ку Богу а з ньой выходячов любвов ку ближньому, подаючі духовну милостыню потребуючім нашым свловом: потіхы, повзбуджіня, но і напомянутя. Але і матеріалну: наповнюючі Хрістовы слова, Я єм быв голодный… а вы сьте мі послужыли.

Просьме того великого Божого Святителя Николая най нам выпрошать у Господа, жебы сьме прияли тоты слова і приклад його жывота і подля того і жыли. Слава Ісусу Хрісту!

В неділю, 22. децембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. децембра 2024 р. о 12.00 год. і 23. децембра 2024 р. о 2.00 год. за русиньскым часом.