«Слово» – Праздник св. Василія Великого – неділя, 9.00 год.

Св. Василій Великый – великый стовп нашой восточной Церькви, основоположник монашеского жывота, архієпіскоп кесарії Кападокійской.

Народив ся коло року 330. По штусіях в Цариграді і Афінах ся вертать як славный філозоф і речник. Но його сестра Макрина спознавать небезпеченства оддаваня ся світьскій карьєрі, котра го чекала. Так він одходить до Палестины, Еґіпту, Сірії і познавать жывота многых пустынників. Кедь ся вернув, зачав провадити аскетічный жывот.

Но Бог його покликав, жебы боронив правдиву віру як помічник єпіскопа проти аріанів. Так є высвяченый на священика, пізніше на єпіскопа. Як єпіскоп старав ся о людьскы душы. Ці по матеріалній сторінці – вызывав, жебы люде отворили свої сердця і допомагали бідным і терплячім, або по духовній – проповідав покаяня.

Говорив: Плачме над мартнотов минулого жывота, не прогайнуйме даного нам часу. Поуказовав, же мы можеме зраховати нашы гріхы, але Боже милосердя перевышує вшыткы нашы гріхы. Младенця, котрый ся уписав про земну любов діаволу, ослободжує од злого.

Не бояв ся міцных того світа. Єпархови Модестови сміло одповідать на його грозьбы мучіня, выгнаньства і конфішкованя маєтку. Василій зіставать покійный.

З чого выходила мотівація у св. Василія.? Св. Ефрем Сірійскый увидів на пустыні огняный стовп і чув голос: Такый є св. Василій. Огняный стов любви ку Богу і ближньому. І мы собі просьме через його застоятельство быти правдивыма выконователями головной заповіді любви ку Богу і ближньому. Хрістос раждається!

В неділю, 16. януара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. януара о 12.00 год. і 17. януара о 2.00 год. за русиньскым часом.