«Слово» – Праздник св. Василія Великого – неділя, 9.00 год

Св. Василій Великый, велике світло і стовп нашой восточной церькви. Народив ся коло року 330 в Кападокії (днешня Турція). Уж по народжіню быв барз хворый.

Його отець молив ся за нього і в сні чув голос: Ідь, твій сын жыє. Коли ся збудив рано, маленькый Василій быв здравый. Дітинство пережыв у свойой бабкы Макрины старшой в Неокесарії, котра йому розповідала о часах переслідованя. Як она мусила з далшыма блукати ся по лісах і горах, і як їх Бог сохраняв. Тоты слова записовали ся до душы молодого хлопця.

Потім зачав переходити навчаня в Кесарії, Цариграді а наконець в Атенах. Но свойой мудростьов перевышовав учітелів. А так нечудо, коли ся вернув, дома його чекала славна будучность і велика і богата карьєра. І Василій якбы тяганый лавинов марной світьской славы, давав ся ньов нести.

Но його сестра, св. Макрина, котра виділа, же Василій ся дав сторгнути світьсков славов, його напоминать. А він прияв ласкавы слова свойой сестры, і одходить по пустынях Палестины, Месопотамії, Сірії і Еґіпту спознавати жывот монахів. Коли ся вернув, зачав сам так жыти, пише правила. Но Господь його кличе на служіня Церькви в часі єресы Аріанізма.

Василій став священиком і пізніше архієпіскопом Кесарії. Стояв тверддо і неустрашымо простів вельможів того світа. Не бояв ся ани самого імператора Валента, котрый быв прихыльником Аріа, ці потім Юліана Одступника, котрый запроваджовав поганьство. Св. Василій мав перед собов два прінціпы – вшытко робити на Божых очах і вшытко робити на Божу славу. Так выповнив найголовнішу заповідь – любви ку Богу і ближньому.

І нас позывать жыти подля тых двох прінціпів – мати Бога перед очами в каждій сітуації, і мати прягнутя робити вшытко на Божу славу. Жебы ся Бог прославив в нашім жывоті. Най наш святый отець Василій выпрошать ку тому потрібны благодати. Хрістос раждаєтся!

В неділю, 17. януара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. януара о 12.00 год. і 18. януара о 2.00 год. за русиньскым часом.