«Слово» – Праздник Воздвиженія Честного Креста – неділя, 9.00 год.

Праздник Воздвиженія Честного Креста, котрый теперь святкуєме, є праздником радостным. Коли чуєме слово крест, такой нам думкы ідуть на Хрістовы страсти. Но тот праздник говорить нам о плодах Хрістовых страстей.

Є то тым побідным знаком, перед котрым демоны утікають. Не можуть знести погляд на тот знак, на котрім Хрістос зничів владу діавола над упавшым людством. Хоць як діавол старав ся затемнити тоту побіду креста. І через імператора Адріана, котрый ненавидів і слово о Хрістови, а хотів вымазати з памяти людей святы місця, де Хрістос жыв і умер за спасіня світа.

Дав поставити на Ґолґофті храм богыні нечістоты Венеры, де понад двасто років приношали нечісты жерты і діавол якбы тріумфовав. Но і коли ся видить, же тоту побіду Хріста даяк не видно, і правый опак. Вшытко як бы свідчіло о тріумфі зла, но тото є лем до часу. І апостол написав слова: Теперь іщі не видно, же Му (Хрістови) є вшытко покорене. Але дефінітівно слово належыть Хрістови у своїм часі. Так было і тогды.

Хоць діавол высмівав ся барз довгу добу, понад двасто років. Но пришов час влады святого Констатнтіна, котрый наперед увидів знак святого Креста на небі зо словам, в тім побідиш, перед бойом з Максентійом. Потім у сні ся му Господь появив і наказав выготовити святый Крест і по щітах вояків выобразити святый Крест. А коли Максентій выбрав ся проти святого Константіна обгородженый різныма ідолами і діаволсков силов, нич не зміг проти знаку Креста. Быв переможеный і загынув у водах Тібера. І Константін торжественно вступив і взяв владу над Римом.

Його мати свята Єлена выбрала ся до Палестины обновити святы місця, осквернены ідолопоклонством і найти тото велике сокровище – святый Крест. А коли єден Жыд на імя Юда указав місце, она дала розваляти храм Венеры і нашла три кресты. Господь через чудесне выздравліня указав на свій Крест. А коли тота гудка пішла, же нашов ся Крест Господній, народ тиснув ся хотячі видіти Крест. Тогды патріарх Макарій його высоко піднимать і благословить на вшыткы світовы стороны. І тым указав, смотьте, побіда належыть Хрістови.

Прото і мы видиме тот обряд по нашых церьквах, жебы нам припоминало, же лем тот хто є з Хрістом, є Йому вірный, лем тот не мусить бояти ся, хоцьшто бы ся діло противне тому. Хоць яков силов бы зло тріумфовало. Хоць бы сьме виділи, як неприятелі Хріста ничать кресты, одсторонюють з публічных місць ці будов. Або докінця заказовали і носити на шыї публічно святый Крест, можеме зістати покійны. І повісти вєдно з апостолом Павлом: Знам, кому єм увірив а мам істоту. Так погляд на Крест нас наповнять радостьов, же належыме Хрістови і ку нам односить ся побіда Хріста. Правда, кедь вытримеме у вірности Хрістови. Слава Ісусу Хрісту!

В неділю, 29. септембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. септембра 2024 р. о 12.00 год. і 30. септембра 2024 р. о 2.00 год. за русиньскым часом.