«Слово» – Праздник Вознесенія – неділя, 9.00 год.

Ісус Хрістос по своїм Воскресіню появляв ся своїм ученикам, робив чудесны діла, і говорив їм о Царьстві Божім. Перебывав з нима, но іншым способом, бо Його тіло уж было прославлене, уж не підлігало тым земным законам. Так то было по добу 40 днів.

Тот день нихто із них не знав, што буде наслідовати, што їх чекать. Не знали, же послідній раз увидять свого Учітеля і Господа своїма тілесныма очами. Ісус їм і тот день много бісідовав з Божого слова, а потім отворив їм очі, жебы порозуміли Писмам. Жебы порозуміли, же так мало стати ся. Же так через терпіня, высміваня, потупліня, смерть і Воскресіня мав Хрістос войти до свойой славы. Зничіти владу діавола. Отворити ворота неба і заперти ворота аду про тых, котры приймуть Його і увірять Йому.

Так їх вывів на Оливну гору. Там, де та гора была свідком Його кровавого поту, теперь мала быти свідком Його Вознесіня на небо. Там їм говорить тоты красны і потішаючі слова: Дана мі є вшытка міць на небі і на землі. Ідьте робте мі учеників зо вшыткых народів, крестите їх і научте сохраняти вшытко, што я вам наказав. І потім возніс ся од них до неба.

Коли они смотрили за Ним, ангелы їм звістують: Што стоїте і смотрите до неба. Тадь тот Ісус знову прийде так як сьте виділи одходити до неба.

Святый Василій говорить: Де є Хрістос? В небі. Там і ты маш прямовати у своїх думках, словах і ділах. Вознесіня Госда давать і нам новый погляд на вшытко, што діє ся коло нас. Указує нам правду о вшыткім земнім. Же є лем до часу. І богатство, і слава, так само утискованя, ці біды і хвороты. Вшытко тото є лем до часу. І мы сьме лем до часу на землі.

Прото выхоснуйме тот час жыючі тов правдов о вічности. Жыючі тым словом: Хрістос прийде, жебы оддати каждому подля справедливости. Прото выхоснуйме каждый день з думками напряменыма ку небу. Бо не знаме, ці тот день не є єдночасно і послідній в нашім земнім жывоті. Слава Ісусу Хрісту!

В неділю, 16. юна 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. юна 2024 р. о 12.00 год. і 17. юна 2024 р. о 2.00 год. за русиньскым часом.