«Слово» – Рождество св. Йоана Хрестителя – неділя, 9.00 год.

Свята Церьков называть св. Йоана тітулами пророк, предтеча (опередник) і хреститель. Уж святый архангел Гавриїл при появліню святому Захарійови в єрусалимскім храмі звістує о народжіню Йоана, называючі го великым перед Богом, пророком, тым, котрый наверне сердця ку Богу. Но Захарія не увірив словам архангела і зато остав німый. Абы так міг зазвучати пророцькый голос Йоана. При Навщіві Марії у Єлисаветы. Йоан чуючі притомность Господа в утробі Марії, поскочів од радости в утробі Єлисаветы. Выхоснує їй голос: Блажена, котра увірила. При народжіню, коли хотіли назвати його Захарійом, Єлисавета повіла, ні, але Йоаном ся буде звати. Знову Йоан давать свій пророцькый голос матери. Кідь ся звідують отця, він бере таблічку а написав Йоан буде його імя, і розвязав ся му язык і вшткы ся чудовала. Йоан, як пророк на граніці двох завітів, нелем говорить о приході Хріста, але сам іде перед ним і ставать ся його хрестительом. Про його великость празднуєме нелем його народжіня про небо, але і про тоту землю. Уж од першого моменту веде ку вірі в слово Боже, в Слово Отця, котре ся стало тілом, ку котрому Йоан приводив цілым своїм жывотом. Просьме і мы, най тот великый Божый святый укріпить нашу віру в слово Боже, котре было выповіджено через Жыве Слово Боже, Господа нашого Ісуса Хріста. Слава Ісусу Хрісту!

В неділю, 10-го липця/юля 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10-го липця/юля о 12.00, 15.00, 20.00 год. і 11-го липця/юля о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Фреска в монастырю Св. Ахіма Осоговского. Жрідло: Wikipedia.