«Слово» – Святый апостол Лука – неділя, 9.00 год.

Святый апостол і євангелиста Лука походив із Антіохії. Коли Ісус Хрістос оголошав добру новину, Лука щіро увірив і быв зарахованый ку сімдесятьом апостолам.

Быв свідком многых чудесных діл Господніх і його наукы. То іщі веце розпальовало любвов його сердце ку Хрістови.

По Спасителных страстях, не розуміючі іщі Божого задуму спасіня, думав сі, же выткому є конець. Вертать ся із Кеопов до Ємауз. Были наповнены смутком, болістьов. Споминали на радостны моменты перебываня із Хрістом, але уж є конець. Но кедь перебывали в тых темных думках, Ісус як сердцязнатель сам ся приближыв ку ним а звідує ся, чом суть такы смутны. Потім їм зачінать выкладати Писмо, вшытко то, што ся односило ку ньому. Они Його слухають із радостьов. Кедь ся їм давать спознати при ламаню хліба, они сі говорять: Ці не горило наше сердце, кедь нам отворяв Писма? А такой ся вертають назад.

По Сошествіїї Святого Духа Лука ся вернув до Антіохії, де став помічником апостола Павла. Быв з ним і почас вязніня в Римі. По мученицькій смерти Павла ся вертать і далше проповідать Євангеліє. Наконець в Ахаї за свою вірность Госдподу умерать з любви ку Ньому мученицьков смертьов.

Святый Лука нам написав святе Євангеліє, Діяня апостолів. Подля традіції тыж першый написав іконы Пресвятой Богородіці і апостолів. Слово, котре нам хоче передати є: Ці нам не горіло сердце? Коли горіло сердце? Не при погляді, або слуханю дачого земного, але при слуханю Божого слова.

Най і наше сердце буде запалене огньом Хрістовой любви, коли береме до рук Боже слово, або його чуєме на нашых богослужінях. Жебы гнаны Хрістовов любвов сьме выдавали свідчіня о Жывім Хрістови, Спасительови нашых душ.

В неділю, 31. октобра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. октобра о 12.00 год. і 1. новмембра о 2.00 год. за русиньскым часом.