Празднуєме память Усікновенія головы Йоана Крестителя. Тот праздник нам вказує, што є одмінов за гріх. Тов одмінов є смерть. Йоан Креститель сміло стояв за правду, не смотрив на особы. А то ани самого царя – тетрарху Ірода, сына Ірода Великого, што дав повбивати віфлеємескы діточкы.
Ірод собі взяв за жену Іродіаду, жену свого брата Філіпа. Йоан напоминав Ірода: Не смієш єй мати. Тадь належыть твойому братови. Зато Іродіада ненавиділа Йоана, і нагваряла Ірода, жебы го дав убити. Но Ірод бояв ся так зробити про народ, котрый тримав Йоана за Божого пророка. Но наконець піддав ся натиску Іродіады і дав го заперти до вязніці. Но і так приходив його слухати, і рад його слухав. Але кедь ся вернув ку Іродіаді, забывав на Йоановы слова.
Іродіада все глядала способ як убити Йоана, аж пришов день народенин Ірода. Він зробив своїм вельможам велику гостину. Дівка Іродіады Саломія пожадливо танцьовала а Ірод опоєный страстьов пожадливости їй дав присягу, же дістане хоцьшто попросить. Так Іродіада выхосновала тоту сітуацію і нагварила дівку, жебы просила голову Йоана Крестителя. Ірод наперед не хотів, но про присягу не хотів одперти, а так выконав тото грозне прошіня і дав стяти Йоана.
Бог выхосновав і тото зло на добро. Йоан быв опередником Ісуса Спасителя на землі і став ся опередником і в аді, де пришов оголошати скорый приход Спасителя.
А Іродіада, котра радовала ся, же уж нихто не буде вытыкати а може собі спокійно жыти, недовго тырвало тот зданливый покій. Ірод быв посланый до выгнанства, позбавленый царьства, де умер в бідноті а Соломія загынула грознов смертьов на замерзнутій ріці, коли упала до воды і крыга одрізала їй голову.
Памятайме прото, же гріх не пинесе щастя. Хто ся йому оддасть, того погубить. Хто буде вірный Господу, тот буде блаженый по цілу вічность. Смерть Йоана была з погляду того світа понижуючов, была побідов гріха над правдов, но з Божого погляду была славнов. Бо честна пред Господом смерть преподобных єго! Слава Ісусу Хрісту!
В неділю, 13. септембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. септембра о 12.00 год. і 14. септембра о 2.00 год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі