«Слово» – Закхейова неділя – неділя, 9.00 год.

Ісус Хрістос приходить до міста Єріхон. Коли переходить через нього і з Ним множество народа стрічать ся із Закхеом, головным мытарьом і великым богачом.

Но Закхей быв малого зросту. Він хотів видіти Ісуса, а так вышов на фіґовый стром на місці, де Ісус мав переходити. Но скорше як Го увидів, Ісус пришов ку тому місцю, заставив ся, посмотрив горі і закликав го, жебы зышов долов, бо хоче быти в його домі. Закхей такой го з радостьов прияв, но тото собі выслужыло погоршіня, наріканя од многых. Закхея вшыткы ненавиділи, бо допустив ся многых кривд, несправедливостей. А так у своїм внутрі то многы Ісусови вытыкали. Ісус але быв тихо. Він знав, што ся одбывать в їх сердцях, але тыж і в сердці Закхея. Бо Закхей, як прияв Ісуса до свого дому, повів: Господи, половину свого маєтку роздам бідным, а кедь єм дакому наробив шкоду, верну штирираз веце. Як Ісус тото чув, повів му: Днесь пришло спасіня до того дому.

Сын чоловіка пришов глядати і спасити, што пропало. І про нас є велике поучіня з днешнього слова: Закхея вшыткы одсуджовали як великого грішника. Ісус го не одсудив. Не брыдив ся зайти і до його дому. Так Бог робить і з нами. Не одсуджує нас, хоць як бы сьме глубоко пали. Але коли приходиме із щірым наміріньом, хочеме справды робити покаяня – внутрішнью зміну, втогды сам Ісус бере ініціатіву приходить а говорить і нашій душі: Днесь пришло спасіня до той душы. Слава Ісусу Хрісту!

В неділю,  02. фебруара 2020 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 02. фебруара 12.00 год. і 03. фебруара о 2.00, год. за русиньскым часом.

фото: Ісус і Закхей. Собор Св. Марка . Жрідло Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА