З жальом інформуєме, што німецка меншына на Шлеску досвідчыла того, чого Лемкы іщы не так давно в декотрых селах на Лемковині. Як подал на своім фейсбуковым фанпейджы Бернард Ґайда, активіста німецкой меншыны, на Опольскым Шлеску были замалюваны двоязычны польско-німецкы таблиці з назвами місцевости.
Направдоподібнійше знищено таблиці вночы з 18. на 19. мая тр. Як реляцийонувал Ґайда, коли ішол автомобільом через місцевости, взріл замалюваны таблиці. Б. Ґайда то єден з двох представників німецкой меншыны в Спільній Комісиі Уряду і Нацийональных та Етнічных Меншын. Єст ведучым Звязку Німецкых Соспільно-Культурных Стоваришынь в Польщы.
Знищены были таблиці м.ін. такых місцевости як Осіны (нім. Rothaus) Бзіниця Нова (нім. Wilhelmshort) ци Бзіниця Стара (нім. Bzinitz). Ґайда пояснил, што о справі будут поінформуваны власти ґмін Компрахциці і Добродзєнь, котры таблиці з назвами тых місцевости в двох языках ввели в подібным часі як на Лемковині, бо на зламі років 2008-2009. Знакы, подібні як в інчых примірах, были замалюваны і замазаны якісом ближе незнаном субстанцийом, або фарба была выдерта чымсым острым.
Бернард Ґайда припомнул, што таблиці через долгій час были доказом акцептациі і толеранциі для німецкой меншыны. І лемківска меншына в Польщы пару разів стрічала ся з того рода актами ненависти. Парократно інформували сме про нищыня таблиц м.ін. в Білянці, Ріпках, Реґєтові, Ґладышові ци Ждыни, котры были в роках 2009-2011 введены завдякы стараням Стоваришыня Лемківской Молодежы «Чуга» в Польщы.
Солідаризуєме ся з німецком меншыном. Заєдно припоминаме, што тема нетолеранциі і нищыня двоязычных таблиц з назвами місцевости по польскы і в языках нацийональных і етнічных меншын єст знана і інчым меншынам жыючым в Польщы, в тым Білорусам. В липци/юлию 2017 р. інформували сме, што на Підляшы котрисый уж раз были знищены польско-білорускы таблиці.
фот. Бернард Ґайда / Facebook
Коментарі