«Соймове выдавництво» – тым разом про Німців

«Соймове Выдавницто», котре є офіцияльным выдавцнитвом фунґуючым в рамках Сойму Польской Республикы печатало дальшу публикацию з сериі Нацийональны та етнічны меншыны в Польщы. Тым разом книжка дотулят німецкой меншыны, котра прожыват в соспільным і політичным просторі на териториі Польщы.

Книжка тота, подібні як попередні з сериі, вказує найважнійшы аспекты бытуваня Німців в Польщы. Прочытати в ній мож про долгу історию той меншыны на польскых землях, іх культуру, та днешню ситуацию. Публикация презентує найважнійшы політичны і культурны інституциі, котры діют на хосен німецкой меншыны. Дописы до поєдных части книжкы спорядили выдатны історикы, політолоґы і педаґоґы. Книжку мож придбати на сайті выдавництва.

В 2013 році вказала ся подібна публикация – презентуюча лемківску етнічну меншыну. Была то уж четверта в рамах сериі. В лемківскій публикациі публикували так русиньскы, як і польскы науковці і активісты. Книжка поділена на три части: Достоменніст, Істория та Культура і Наука.

Німці то найбільша нацийональна меншына спосеред вычысленых законом про нацийональны і етнічны меншыны та про реґіональний язык з 2005 рока. Подля повселюдного спису з 2011 рока, Польщу замешкує близко 148 тис. осіб, котры задеклярували німецку нацийонайльніст. Факт, же є то найчыселннійша меншына в Польщы, проявлят ся в активній діяльности і політичній силі єй представителів. Припомнийме, же Німці як єдина меншына за послідні рокы каденций польского парляменту мают все єдного посла. В рамках выборчого комітету, котрий фунґує на Опольскым Шлеску, кандидаты, котры стартуют з лист меншыновых комітетів, сут звільнены з 5-процентового выборчого порога. Додайме, же хоц закон дає можніст творити выборчы комітеты вшыткым меншынам, часто принципы схоснуваня того права – реальні – не дозваляют го основати. Прото є то вопрос про Спільну Комісию Нацийональных і Етнічных Меншын, котра фунґує при Раді Міністрів Польской Республикы, жебы стремити ґу новелізациі переписів, ґварантуючых доступ до місц в польскым парляменті для представителів нацийональных і етнічных меншын.