Голосник

Спільне наше діло – будова новой церкви в Ґладышові

Вірны невеликой православной парохіі св. Йоана Крестителя в Ґладышові потрібуют нашого фінансового спертя в ділі побудуваня новой церкви. В інтернеті тырват збірка жертв на дальшы етапы інвестициі.

Дотля повело ся Ґладышівянам довершыти першый етап – выляня фундаментів. Дальшы з них будут о вельо коштовнійшы, ґу чому потріба єст поміч вшыткых нас – незалежно од місця прожываня.

Кажда поміч цінна

Комітет побудуваня православной церкви в Ґладышові з кампанійом направленом на збераня фондів выстартувал в грудни/децембрі 2020 р., хоц першы пляны побудуваня нового храму были уж пару років тому. «В тым році восени, фізичні зачали сме будову церкви. Затверждены сут проєкты, пляны. Актуально сме на етапі фундаментів», бесідує Йоан Дзюбина, парохіянин Ґладышова і член будівняного комінтету.

При першым етапі головно робили самы селяне. Выляна остала велика тафля бетону, груба на 70 центиметрів, а вокруг ней явили ся фундаменты. Завершыньом першого етапу має быти засыпаня тафлі земльом, жебы вырівнати єй з фундаментами. Грубіст выляного бетону залежна была од проєктовых вымогів, што лем збільшыло выдаткы при тій першій основній частині будовы.

Заєдно ґладышівскій парох о. Аркадий Баранчук вєдно з парохіянами зачали передріздяну збірку жертв. За зорґанізуваня колекты одповідальный єст о. Ярослав Ґрич, парох Ждыні і Конечной, котрый так само остал членом будівляного комітету. В тым ціли на вебсайті www.zrzutka.pl тырват інтернотова збірка жертв. Цілю єст зобрати покля што квоту 50.000 зл. На днес є то близко 12.000 зл, але фурт каждый годен доложыти свою жертву. Другым етапом буде поставліня деревяной конструкциі, котра – згідня з пляном – має быти зложена уж на яр.

«Віриме, што з Божом і вашом сердечном помічю подоламе тій будові. Просиме вас з цілого серця о вашы жертвы – аж і тоты найскормнійшы, будут они великым вкладом в діло побудуваня церкви в Ґладышові. Заохочаме тіж подавати мена офіродавців, так штобы сме могли вознести молитвы о благословіня для вас і вашых родин. Кєд Господ нам благословит і діждеме ся посвячыня нашой церкви, вшыткы імена офіродавців будут зложены під престолом ґладышівской святыні», пише ся в інформацийній нотці. Всякы деталі звязаны з передававаньом жерт, найдете за залученым выже мотузком.

Як інформуют ґладышівскы парохіяне, в ціли пошыріня колекты запроєктуваны были і святочны різдвяны карточкы і цеголькы, якы были розосланы до ріжных православных парохій на західніх землях Польщы (предовшыткым лемківскых), але і дальшых, хоц бы на Підляшы.

Єдина така, неповторна

Деревяна церков, котра стане в середині села, буде репликом неістнуючой уж церкви свв. Космы і Даміана з Незнайовой. Ґладышівскій храм буде орєнтуваный, тридільный. Буде то такой перша того рода церков побудувана по ІІ світовій войні, котра своім выглядом припоминала буде в цілости деревяны, памятковы карпатскы храмы. Дотля, новы будуваны церкви на Лемковині, або в деякій мірі навязували своім выглядом до лемківского стилю (церков в Зындрановій, Креници ци Реґєтові) або представляют інчы формы, як напр. церквы в Білянці і Ґорлицях.

Незнаівска святыня – на основі котрой будує ся єй реплика –  была побудувана в 1780 р. в традицийным західньолемківскым стилю. Церков служыла вірным до 1930 р., коли в селі побудувано нову православну церков. Деревяна стара церков не была хоснувана од того моменту до періоду выселінь з 1945-47 рр. Фінально, завалила ся в 1964 р., а вежа впала 1973 в році. Была то єдна з красшых лемківскых церкви в реґіоні.

Дотля православны селяне Ґладышова молят ся в деревяній каплици св. Йоана Крестителя, (возн. в 1857 р., перебуд. в 1914 р.), яка находит ся при єдным з бічных пути в середині села.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі