В днях 11.-19. квітня/апріля 2018 р. єден зо спілпрацівників Стоваришыня «Руска Бурса» в Ґорлицях, Якуб Зиґмунт, взял участ в інтересуючым тренерскым школіню «Natural Elements Training Course» з унійного проґраму Еразмус+, што было реалізуване в рамках Східнього Партнерства Европейской Уніі. Школіня, якє направлене было на тренерів і молодіжных та соспільных працівників, што наштоден роблят в позаурядовых орґанізациях, прошло в International Scouting Centre в Руставі, в полудньово-східній Ґрузиі. Школило ся разом 30-ох участників зо 14-ох европейскых держав, м.ін. з Портуґалиі, Естоніі, Білоруси ци Азербайджану.
В рамках школіня проходили занятя та сесиі тыкаючы писаня і творіня проєктів, метод і технік роботы з ґрупом, динамікы ґруп, знань презентациі, ролі тренера в ґрупі і тренерскым ансамбли, медияций і модерациі бесіды та розвязуваня конфліктів в ґрупах. Мало оно практичний характер і вшыткы аспекты были рішены в правдивых ситуациях. Што більше, занимано ся і темом метод роботы при схоснуваню елементів пророды, рытуалів, символів та природных циклів.
Опіку над проєктом тримал тренерскій ансамбль, в склад якого входили Гонза Ляталь та Бара Роді з Чех і Кармін Роді Фалянґа з Італиі. В формальных справах допомагали ім Мажена Плес з Польщы і Ґеорґі Кікалішвілі з Ґрузиі.
Цілю школіня было вказати, як важну ролю мат неформальна едукация. Каждий з участників на закінчыня курсу отримал цертифікат «Youthpass», што потверджат тренерскы і орґанізаторскы знаня.
В рамках проґраму Еразмус+ орґанізуваных є вельо молодіжных вымін і професийных школінь, на якы можут іхати і інчы заінтересуваны темом неформальной едукациі. Стоваришыня «Руска Бурса» в Ґорлицях про дальшы буде певністю інформувати. Більше про проґрам Еразмус+ чытайте за мотузками: www.salto-youth.net i www.erasmusplus.org.pl.
Знимкы: Мажена Плес
Коментарі