Списало ся уж майже 60 процент жытелів. Нижня Писана веде меджі селами

По третім тыждню од зачатку списованя жытелів (15-го фебруара) є списаных 58 процент жытелів Словакії. Найліпше є на тім Жіліньскый край, де ся уж списало 61,5 процента людей, найгірше Кошыцькый, в котрім є затля списаных лем 51,3 процента жытелів.

О частковых даных списованя інформовала говоркыня Списованя жытелів, домів і квартелів 2021 Ясміна Стаудер. Інформацію принесла аґентура TASR.

Меджі селами найліпша Нижня Писана

Што до крайскых міст, веде Баньска Быстріця з веце як 62-ма процентами списаных. Головне місто Братіслава має списаных майже 60 процент.

Меджі селами веде русиньске село Нижня Писана в окресі Свіндик. Село, в котрім ку кінцю 2019-го року жыло 81 людей, евідує вже 94 процент списаных жытелів.

„Списованя жытелів береме за важный проєкт, і зато сьме ку ньому приступили актівно. Каждого жытеля познакомили сьме з проєктом, давали сьме до поштовых скринок інформачны матеріалы і реґуларно додавали інформації. Первенство нашого села ня, самособов, барз тішыть і єм на нашых жытелів гордый,“ повів староста Нижньой Писаной Мартін Мочілелнко.

Списованя не одкладайте

Штатістічный уряд Словацькой републікы вєдно з Урядом верейного здравотницьтва апелують на жытелів, жебы выужыли безпечну можливость списати ся електронічно в комфорті свого домова, і помогли списати ся електронічно своїм старшым членам родины, покля о то пожадають.

Штатістічный уряд так само припоминать, жебы люди списованя не одкладали. Списати ся мусять до кінця марца, асістоване списованя буде проходити од апріля до кінця октобра.

„В часі пандемії хвороты COVID-19 є електронічне списованя жытелів Словакії найбезпечнішов формов, як при списованю хранити своє здравя і здравя остатніх. Зато не роздумуйте і схоснуйте можливость списати ся електронічно,  і поможете своїм близкым дома, покля вас о то пожадають,“ повіла говоркыня списованя Ясміна Стаудер.

Списованя є повинным

Повинность списати ся мають подля закона вшыткы жытелі, котры мають на Словакії тырвале, переходне, але і толероване перебываня. Списати ся є повинный і граждан Европской унії, котрый має на Словакы звычайне перебываня. Неповнолітні особы є повинный списати родіч, припадно законный заступник. За несповніня повинности грозить штроф.

Електронічне списованя кінчіть 31-го марца. Од 1-го апріля до кінця октобра буде проходити асістоване списованя про тых, котры ся не годны были списати самы і наголосили ся про поміч асістента.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА