Спортовий Перегляд Шафы на «Лемковині»

Великыма кроками зближают ся змаганя в літаню Лемковина Ультра Трейль. О змаганях писали сме уж пару раз на нашым портали (напр. ту, або ту), а гев можете выслухати інтервю з орґанізатором Кжыштофом Ґайдзіньскым.

Змаганя будут проходити в днях 23.-25. жолтня (октобра) на обшырі Лемковины. Выняткове для тых змагань єст тото, же будут проходити не лем за дня, але вночы. По старті з Крениці на найдолшій трасі (150 км) треба буде летіти цілу ніч, пак през ден і зас вночы. Вшыткого 2/3 трасы поконує ся ночом. Окрем той трасы участникы могли записати ся на три інчы долгости 70, 48 і 30 км, зо стартом в Гыровій, Івоничы та Пулавах. Мета вшыткых трас находит ся в Команчы. На місци, по закінчыню змагань, на участників та допінґуючых буде ждало вельо атракций, м.ін. концерт фолькового ансамблю, выстава знимок, великє огниско та Спортовий Перегляд Шафы. Остатня з выміненых атракция то част більшой ініциятывы, якой цілю єст реґулярне збераня спортового облечыня і спортового ґратя для потрібуючых діти (напр. з домів дітины, осередків опікы, ци малых спортовых клюбів). Мож принести напр. кошелькы, ґачкы, блюзы, черевікы, плывацкы чепці і окуляркы та вшытко інче што ся придаст спортсменам, а орґанізаторы змагань передадут тото дальше.

О тым, якє значыня набрала тота подія, свідчыт хоц бы факт, кілько значучых фірм єй спонсорує. Серед них нходят ся м.ін. продуцент облечыня dare 2b, гута шкла Кросно, продуцент навіґацийного систему ҐПС Garmin і інчы, а пaртнером змагань єст напр. автомобільна фірма Jeep. Посеред тых тузів радийо лем.фм мат чест быти медияльным патроном той імпрезы.