Голосник

Стара Любовня буде Місто културы 2021

Два рокы інтензівной роботы принесли місту Стара Любовня позітівны резултаты. В четверь 18-го юна 2020-го року было публіковане рішіня директора Фонду на підпору уменя о приділіню фінанчных средств на проєкт Місто културы 2021 якраз Старій Любовні.

Стара Любовня мала інтерес быти словацькым Містом културы вже у 2020-ім році, но втогды тітул здобыли Новы Замкы і місто на Спіші скінчіло друге. Як інформовала радніця, одвтогды проєкт перешов многыма змінами і іноваціями. Проєкт Стара Любовня – Узел културы (Stará Ľubovňa – Uzol kultúry), котрый быв теперь успішный, здобуде од Фонду на підпору уменя 200 000 евр.

Презентація проєкту проходила 15-го юна і брали на ній участь вшыткы, котры творили фіналну подобу проєкту, окрім іншого і председа Русиньской оброды на Словеньску Мартін Караш, котрый є директором Любовняньского освітнього центру, ці Далібор Мікулик, директор Любовняньского музею. За предкладателів проєкту были участны Любош Томко, пріматор Старой Любовні і Ева Колларова, ведуча одділіня школства, културы, шпорту і молодежи.

Узел културы

Проєкт Узел културы, як інформовало місто, є основаный на сприниманю културы як творивой енерґії, котра спаять еколоґічно і сполоченьскы одповідну позіцію жытелів односно міста і світа довкола. Актівности проєкту будуть проходити в штирьох драматурґічных лініях, котры мають назвы URBAN CLASH, ZOOM, OКОМ і ЛАБОРАТОРІЯ.

В рамках тых драматурґічных концептів ся рахує з актівностями заміряныма на співпрацу, конфронтацію умелців, на гляданя іновацій в рамках сполоченьскых, културных і економічных поступів, котры перепоять еколоґію і уменя, на презентацію реґіоналной історії в одношіню зо світовов, але і на традічну народну културу з умелцями і фаховцями.

Хотять утримательность проєкту

Стара Любовня не хоче тітул Місто културы 2021 схосновати лем на єден рік актівностей, а думала і на утримательность проєкту до далшых років.

„Освітов, творивыма дільнями, запоїньом комуніт, сітьованьом културных інштітуцій, вышколіньом людей досягнеме утримательность проєкту,“ інформує місто на своїх офіціалных вебоых сторінках. Стара Любовня хоче ку актівностям притягнути вшыткы віковы катеґорії, жебы была култура про вшыткых і зохабити так одказ будучім ґенераціям.

Назвов проєкту Узел одказуюзь на перепоїня різных тіпів културы і уменя, різных актерів културного діяня в місті, в реґіоні і мімо нього, різных часовых періодів. Стара Любовня як Місто културы 2021 має быти подля орґанізаторів комбінаційов історічных обставин і скушеностей зо сучаснов акчнов ґенераційов културно-сполоченьскых діятелів міста і реґіону, з выужытьом модерных технічных і маркетінґово-комунікачных інштрументів а перепоїньом на народный і меджінародный културный контекст.

Буде ся на што тішыти

Стара Любовня в рамках здобытого тітулу рахує з далшым розвитком і реалізованьом ся містных умелців, но хоче і розшырити културный жывот в місті о жанры, котры моментално бракують.

„Жытелі і навщівници міста Стара Любовня ся можуть тішыти на розмаїту мозаіку културных, сполоченьскых і освітніх подій,“ інформує місто з тым, же о дакотрых подіях будуть жытелі міста годны вырішовати формов анкеты. О вшыткых приготовльованых акціях буде місто реґулерно інформовати вже од 1-го юла 2020-го року.

Як было спомянуте, місто хоче схосновати в рамках проєкту і народну културу. Спіш є історічно домовом нелем про Словаків, але і про Русинів, Німців ці Ґуралів, зато Стара Любовня як Узел културы може досправды прийти з різныма інтересныма подіями, на котры ся мож вже теперь тішыти.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі