Стара Любовня приготовлює біціґльову стежку аж до Орябины

Сіть біціґльовых стежок в Старій Любовні поступно розшырює ся. Як інформує аґентура TASR, по тім, што є окресне місто споєне із сусідніма селами Гнієздне і Хмельніця, тамтешня радніця приготовлює далшы трасы.

Місто Стара Любовня на своїм вебсайті інформовало, же влони подарило ся докінчіти ціклостежку в місті, котрой прямым продовжіньом бы мала быти траса аж до Новой Любовні з напоїньом на уж існуючу біціґльову стежку до Любовняньскых купелів. Но Стара Любовня бы мала мати біціґльову трасу і до русиньской Орябины.

„В сполупраці із селом Орябина, котре здобыло фінанції із Вызвы про реґіон Пряшівского самосправного краю на проєктову документацію ціклостежкы Стара Любовня – Орябина, зачали проєктовы роботы на тій трасі,“ інформує самосправа з тым, же зачаток стежкы бы мав быти при вступі до Старой Любовні од Попраду.

Траса довга нецілы три кілометры пак продовжує топольовов алейов ку Мултімодалній станіці в селі Орябина, котра є близко Орябиньского перелому. Орябиньскый перелом є Храненов природнов резерваційов, котра находить ся у выходных Полонинах, і є інтересным турістічным місцьом з каньоном.

Місто має з ціклостежками до сел добры скушености. Як інфомровало, траса Стара Любовня – Гнієзнде стала барз популарнов і є хоснована вшыткыма ґенераціями людей. На уж існуючіх ціклостежках приготовлює далшы выліпшіня і розшыріня, місто рахує і з выбудованьом скейтпарку ці пумптраку про біціґлістів.

Жрідло фотоґрафії: Manfred Antranias Zimmer/Pixabay.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА