Стародавна Підкарпатьска Русь онлайн

В днешній добі музеї і бібліотекы по цілім світі діґіталізують свої збіркы, жебы так уможнити людям по цілім світі приступ і ку такому културному богатству, котре бы сьте іншак може ниґда не могли особно видіти. В рамках бібліотек публікують ся такым способом книжкы, котрым вже пропали авторьскы права.

Діґіталізацію робить і Нюйорьска публічна бібліотека (The New York Public Library), котра дотеперь дала приступ ку 670 000 наскенованым образкам. В рамках того суть публікованы скены тісячох рукописів, мап, фотоґрафій, нотовых записів, карток і далшых іншых цінных матеріалів.

В рамках публічно доступных матеріалів можете собі теперь посмотрити і наскеновану копію книжкы од автора Серґея Константіновіча Маковского, котра вышла наперед у 1925 році у выдавництві Plamja Praha під назвов Lidové umění Podkarpatské Rusi (Народне уменя Підкарпатьской Руси). В діґіталній подобі можете посмотрити собі анґліцьку верзію книжкы выдану у Празі у 1926 році під назвов Peasant art of Subcarpathian Russia.

Сто чорнобілых і десять фаребных цілосторінковых якостных добовых фотоґрафій із супроводным текстом прекрасно і інтересно пописує окремы области русиньского народного уменя, вказує облечіня, архітектуру, але і много далшого зо жывота Русинів на Підкарпатьскій Руси на зачатку 20-го столітя. Інтересну фотоґрафічну книжку, котра в чеській верзії была перевыдана у 2009-ім році в Ужгороді, собі можете посмотрити ту.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА