Стоваришыня Лемків в обороні лемківского языка

1. вересня/септембра 2020 р. на сайті Стоваришыня Лемків явил ся комунікат зо становиском той орґанізациі, односячый ся до заявы Всеукраіньского Товариства Лемківщына, котре заперечыло істнуваню лемківского языка.

Члены Стоваришыня Лемків выразили свій непокій, в звязку з реченом заявом, яка явила ся на сайті Товариства 14. серпня/авґуста 2020 р.

Припомнийме, што в заяві, ґу котрій дало одповід Стоваришыня Лемків, Товариство Лемківщына, котре діє на Украіні, написало, же ніт лемківского языка, а Лемкы то частина украіньского народу. Заява Товариства то одповід на зложену до Президента Украіны петицию, жебы вызнати лемківскій як язык на державным рівни Украіны і надати му особливый статус в розуміню украіньскых законів. Особу, котра подала петицию, Товариство назвало провокатором, а саму ініциятиву окрислили як «ганебну». Товариство Лемківщына зажадало, жебы петиция была знята. В інчым припаді власти той орґанізациі застерегли собі право до повідомліня одповідніх служб.

«Наше Стоваришыня согласно выражат спротив в однесіню до антилемківской і антидемократичной поставы Товариства Лемківщына на Украіні. Зазначаме, што незалежно од нацийональных поглядів і од інтенций внескодавці, каждый чловек має право до свободы думаня, слова і власных переконань, бо тото вшытко єст основом демократичного світа», чытаме в комунікаті Стоваришыня Лемків.

При кінци свого комунікату Стоваришыня Лемків выразило надію, што власти Товариства Лемківщына змінят свій підхід до «найціннійшой перлины каждого Лемка – рідного языка». Текст комунікату Стоваришыня Лемків был напечатаный тіж в тлумачыню на польскій язык.