Стріча членів Руской Бурсы з урядниками департаменту од меншын МВСіА

Дня 13. грудня/децембра 2016 рока члены заряду Стоваришыня Рускa Бурсa і медияльной ґрупы ЛЕМ.фм стрітили ся з представниками Міністерства Внутрішніх Справ і Адміністрациі в Департаменті Віроісповідань та Нацийональных і Етнічных Меншын в Варшаві.

Зо стороны Руской Бурсы і ЛЕМ.фм присутны были: Павел Малецкій – ведучий заряду Стоваришыня Руска Бурса, Даміян Трохановскій – заступця ведучого заряду/шефредактор Панрусиньского Тыжденника ЛЕМ.фм+, Богдан Ґамбаль – скарбник РБ/шефредактор радия ЛЕМ.фм. Зо стороны Міністерства: Юзеф Ружаньскій – Директор Департаменту Віроісповідань та Нацийональных і Етнічных Меншын – представник Міністра ВСіА, Анджей Марціняк – Начальник Выділу Нацийональных і Етнічных Меншын, Аґнєшка Ахтабовска та Катажына Яворска-Пульхни – специялисты в Выділі Нацийональных і Етнічных Меншын.

Стріча мала на ціли представити актуальны проблемы РБ, а особливо тоты, повязаны з односинами взглядом другых народовых ґруп в Польщы. Звернена была увага на патолоґічны явиска ґрантового систему, передставлено тіж пакєт пропонуваних розвязань. Важным пунктом бесіды был проблем розвитку і підтримуваня лемківского языка на одповіднім рівни.