Стріча представителів меншын із директорами народностных музеїв

В середу 26-го септембра 2018-го року проходила в братіславскім владнім готелі Bôrik стріча председы Выбору про народностны меншыны Ласла Буковского із директорами народностных музеїв.

Участный стрічі, на котру скликаня Буковского повірили членове народностного выбору, быв так само ґенереланый директор Словацького народного музею (СНМ), під котрый народностны музеї належать, представитель Міністерства културы Словацькой републікы, котре є зряджовательом СНМ і представителі народностных меншын, котры мають музеї. За русиньску народностну меншыну брав участь Ян Липиньскый, председа Округлого стола Русинів Словеньска, котрый є єдночасно членом – заступником Выбору про народностны меншыны і етнічны ґрупы. Участна была і директора СНМ – Музею русиньской културы в Пряшові Олґа Ґлосікова.

Выслідком суть рекомендації

На стрічі были презентованы інформації о розвитку і актуалнім стані окремых народностных музеїв, як і о резултатах і позітівах їх діялности, інформує офіціалный сайт уповномоченого про народностны меншыны і етнічны ґрупы. Єдночасно были ідентіфікованы і дакотры проблемовы области і сформулованы шпеціфічны і сполочны рекомендації.

„Резултатами стрічі є дакілько рекомендацій про зліпшіня стану народностного музейницьтва, головно потреба підниманя фінанчных средств про музеї народностных меншын, і на фахову і аквізічну діялность,“ пише сайт уповномоченого.

В рамках діскусії дішло ся до того, же є потрібна підпора фаховой діялности і посередництвом посилніня персоналного в народностных музеях. Музеї бы мали в будучности співпрацовати з орґанізаціями народностных меншын. Участны згодли ся і на тім, же треба забезпечіти реґуларны стрічі односно проблематікы народностных музеїв в подобнім складі як тотраз, і же є порібне обновити діяня Комісії про музейницьку документацію култур етнічных міноріт.

За резултатами стрічі бы ся мав знова реалізовати і успішный сполочный проєкт народностных музеїв під назвов Музеї і етнікы, котрый мав выняткове значіня про майоріту, з цільом підпоры усвідомліня собі народностной розмаїтости на Словакії. Акцент быв даный і на то, жебы хосновав ся язык меншын в рамках діялности народностных музеїв, з цільом пропаґації языковой розмаїтости Словакії, а то і в области сприступньованя общіх інформацій про людей в языку народностной меншыны.

8 народностных музеїв

Словацькый народный музей справує довєдна 45 музеїв або обєктів, в котрых находять ся історічны і умелецькы експозіції. В тім чіслі є і вісем народностных музеїв. Свій музей мають на Словакії Хорваты, карпатьскы Німці, Мадярі, Чехы, Русины, Ромове, Українці і Жыды. Далшых пять народностных меншын, котры суть вызнаны на Словакії, свій музей не мать.

Словацькый народный музей – Музей русиньской културы в Пряшові выникнув ку 1-му януару 2007-го року. На посаді директоркы є од выникнутя Олґа Ґлосікова. Музей быв на зачатку свойой діялности в арендованых просторах. 31-го децембра 2013-го року была святочно одкрыта часть будовы музею, котра вже є маєтком інштітуції.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА