Studium Carpatho-Ruthenorum 2020 не буде

В часі пандемії, коли окремы державы прияли різны крокы і рештрікції, жебы заборонити пошырьованю нового тіпу коронавірусу, многы події, на котры сьме звыкнены в русиньскім середовиску, не мож реалізовати.

Зрушена вже дефінітівно была Русиньска ватра на Малім Липнику, Русиньскый фестівал у Свіднику натеперь зістав переложеный на септембер. Далше дефінітівне рішіня зробило ся в повязаню із Studium Carpatho-Ruthenorum 2020 – Межінароднов літньов школов русиньского языка і културы, котра мала тот рік мати вже свій 11-ый річник.

Універзіта є заперта

Як інформовала нашу редакцію Анна Плішкова, директора Інштітуту русиньского языка і културы Пряшівской універзіты в Пряшові, зрушіня є повязане з цілосвітовов сітуаційов, кедьже на літню школу все приходили штуденты і зо Севереной Америкы, но і далшых країн світа, а єдночасно і з тым, же Пряшівска універзіта є од зачатку пандемічной сітуації заперта про штудентів, вступ до ньой теперь мають лем робітници той інштітуції.

Літня школа Sudium Carpatho-Ruthenorum 2020 мала проходити од 7-го до 27-го юла. „Хочеме подяковати вшыткым приголошеным штудентам за їх інтерес о проєкт і высловити надію, же в будучности обєктівна сітуація нам доволить продовжовати в реалізації проєкту і прияти домашніх і загранічных штудентів, котры мають інтерес учіти ся русиньскый язык, історію і етноґрафію карпатьскых Русинів,“ інформовала Плішкова.

Studium Carpatho-Ruthenorum

Тритыждньовый едукачный проєкт, котрый на Пряшівскій універзіті в Пряшові реалізує Інштітут русиньского языка і културы під назвов Studium Carpatho-Ruthenorum, є заміряный на навчаня русиньского языка, історії, літературы, културы і етноґрафії карпатьскых Русинів.

Лекції з тых дісціплін паралелно забезпечують ся в русиньскім і анґліцькім языку посередництвом загранічных і домашніх высокошкольскых педаґоґів.

В рамках літньой школы є про участників каждый рік традічно приготовленый і богатый супроводный проґрам. До нього належать навщівы културных подій, інштітуцій, ці екскурзії в реґіоні северовыходной Словакії, но штуденты зайдуть і на Лемковину.

За десять років існованя літньой школы єй абсолвовало понад 210 штудентів з різных держав світа. Є то єдина русиньска літня школа свого тіпу на світі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫК