Сумар дня 10. марця 2023 р.

Приносиме вам сумар медияльной ґрупы ЛЕМ.фм+ на ден 10. марця 2023 р.

Медженародны варштаты «Язык і Травма»

Днес послідній ден Інтердисциплінарных Варштатів «Язык і Травма», якы проходят од середы 8. марця на Університеті Дуйсбурґ-Ессен в Німцьох. Подія тота має на ціли продолжати дискусию про травму як мультідисциплінарну обшыр, через досліджаня ролі языка в дискурсивным конструуваню травмы як предмету знаня, його заанґажуваня в реальне досвідчыня травмы та його потенциялу і ограничынь в наррациі травмы. Так як другы інтенсивны досвідчыня і емоциі, як біль, жаль і зліст, травма тыкат границ того, што мож повісти. В часі варштатів науковці з цілого світа презентували своі розважаня на тему ріжных обшыри звязаных з языком і травмом або вказуючых повязаня языка і травмы. Серед тогорічных выкладів нашол ся і такій презентувал результаты досліджынь веденых тіж серед Лемків. Науковці з Варшавского Університету з выділу Артес Лібералес – проф. др габ. Юстина Олько, др Бартломєй Хромік і Йоанна Марыняк презентували результаты досліджынь на тему «Втрата языка і історична травма – меджекультуровы спостережыня етнічных меншын і корінных соспільности».

Новы автобусовы получыня на Нижнім Шлеску

Жытелі Нижнього Шлеска будут мочы хоснувати новы автобусовы получыня, реализуваны Нижньошлезском Желізницьом. Автобусовы курсы мают быти зінтеґруваны з реґіональныма желізницьовыма получынями. Як подал маршалок Нижньошлезского Воєвідства Цезарий Пшыбыльскій, жытелям буде легше в штоденній комунікациі до працы або школы. Розвиток транспортовой доступности є пріотитетом для самоуряду воєвідства. До сіти автобусовых получынь будут тепер приданы три новы трасы: з Ліґниці через Злоторыю і Лвувок Шлезскій до Єленьой Горы, з Хоцянова без Пшемків і Радваниці до Ґлоґова ай з Сыцова до Олесниці. Автобусы не лем підут столицями повітів, але і зліпшат комунікацию в польковицкым повіті, кєд же ґміны Пшемків і Радваниці зыскают получыня з Ґлоґовом і Хоцяновом. На єдным «желізницьовым» білеті мож доіхати аж і до Вроцлавя. Цілю такого розвязаня єст подля самоуряду протидіяня комунікацийному выключыню.

40. річниця єпископского рукоположыня владыкы Йосифа Головача

В четвер 16. марца тр. в ужгородскым Грекокатолицкым Хрестовоздвиженьскым катедральным соборі припомянут собі округлу в. З той нагоды буде в соборі одслужена архієрейска літургія. Владыка Йосиф Головач был помічным єпископом Мукачівской грекокатолицькой єпархіі і титулярным єпископом созопольскым в Хемінонто. Владыка Йосиф Головач выконувал і функцию ректора Ужгородской богословской семінариі. Владыка Йосиф стоял вєдно з владыком Іоаном Семедійом на русиньскых позициях, коли украіньскы єпископы натискали в 1990 р., жебы Мукачівска єпархія приєднала ся до складу украіньской церкви. Щестливо подарило ся ім утримати окремый статус русинськой Мукачівской єпархіі. Владыка Йосиф Головач вмер в 2000 р. в Ужгороді.

Лемківска поезия в Старым Театрі в Кракові

Уж в тоту неділю 12. марця в Старым Театрі в Кракові вызвучыт лемківска поезия. Вершы Петра Мурянкы, Володислава Грабана, Олены Дуць-Файфер, Павла Стефановского і Стефаніі Трохановской презентуваны будут в рамках Краківского Салону Поезиі. Выбір вершів походит з найновшой антолоґіі лемківской поезі пн. «Вертаня», в котрым поміщены сут тіж тлумачыня на італияньскій язык.