Сумар дня 16. марця 2023 р.

Приносиме вам сумар медияльной ґрупы ЛЕМ.фм+ на ден 16. марця 2023 р.

Збірка вершів Павла Стефановского

В остатнім часі вышла посмертна збірка вершів выдатного лемківского діяча і поеты Павла Стефановского. Вказала ся она завдякы стараням діти покійного – Лідиі і Штефана. «Павел Стефановскій. Выбраны вершы» то публикация, яка одкрыват нам Стефановского як інтелектуалисту і провідника. Збірка єст по польскы, але тырвают уж працы над лемківском версийом. Выданя збогачене єст знимками і документами з приватного архіву Стефановского, котры зберал він ціле своє жытя. Вступне слово, в котрым Стефановскій представленый єст як політик, діяч, чловек культуры, поета і етноґраф, зрыхтувала др габ. Олена Дуць-Файфер. В публикациі найти мож і спомины інчых осіб о Стефановскым. Збірку мож придбати в друкуваній версиі, але доступна єст і онляйн в форматі pdf (мотузок найдете на нашым портали в рецензиі публикациі).

Торг Книжок в Новым Саді і русиньскы публикациі

В днях од 7. до 13. марця проходил у Новым Саді Медженародный Торг Книжок, котрый в столици Войводины орґанізує ся каждый рік. На подіі презентуваны были і русиньскы книжкы од трьох выдавців – выдавництва Рускє слово, Завод про культуру войводиньскых Русинів i Дружство про русиньскій язык, літературу і культуру. Першых двох выдавців запрезентувало ся 9. марця. В фокусі Заводу был Анґлицко-русиньскій словник, котрого головным автором є проф. Михайло Фейса. Выдавництво Рускє слово представило своі актуальны белетристичны наголовкы, головно книгы для дорослых чытачів. Редактор Микола Шанта бесідувал і о книжках оповідань Михала Рамача «У нас на салашу бул ґенерал», книжці Ксені Варґа «Керестурски калеидоскоп» і о романі «Монах и я», котрого авторком єст Любиця Кнежевич. Дружство презентувало своі выданя 11. марця. Представили двоязычну книжку «Руска ґимназия» од Іріны Папуґы, збірник «Studia Ruthenica» чысло 28 як і каталоґ «Стретнуце у Боднарова». Презентовало ся і 9. чысло мультіязычного часопису «Нови мост».

Пряшівска премєра уж заран

Заран, 17. марця Театр Александра Духновича в Пряшові на своій Великій сцені одпремєрує пєсу «Іванов» Антона Павловича Чехова. Режысером є Светозар Спрушаньскій. Як приближує дію пєсы театр, головный герой не розуміє самого себе. Колиси давно был полный жытя і енерґіі. Іванов єст оточеный безнадійныма обставинами в соспільности. Топит ся в безцільовости, безнадіі, всядиль присутній нуді. Головну ролю Іванова грат Євеґній Либезнюк, його жену Сару – Анна Петровна, Владиміра Штефанікова і Ярослава Сисакова. Перед пятницьовом премєром, о год. 18.30 пройде і одкрытя выставы вызначного фотоґрафа і подникателя Ярослава Шуркалы пн. «Чаро театралной фотоґрафіі». Выстава, котру театр орґанізує разом з Музейом Русиньской Культуры в Пряшові, пак буде в просторах театру приступна до 31. мая.

Річник Руской Бурсы 2022

Припоминаме, што кінцьом 2022 р. явил ся дальшый номер часопису «Річник Руской Бурсы». То найстаршый, бо печатаный од 2005 рока, і як дотепер – єдиный істо науковый часопис лемківской меншыны. «Річник Руской Бурсы» находит ся і на списку пунктуваных науковых часописів Міністерства Наукы і Едукациі, є тіж індексуваный в вельох науковых базах. Як науковый часопис піддаваный єст евалюацийній оціні через Index Copernicus International Journals Master List, a тіж має свій ідентифікатор DOI. То одкрытый часопис, што означат, же єст доступный в діґітальній версиі, безплатні, без конечности реґістрациі в сервісі часопису. Доступ до публикациі найдете на нашым портали. Науковом редакторком «Річника Руской Бурсы» єст др габ. Олена Дуць-Файфер, проф. ЯУ.