Сумар дня 20. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 20. квітня/апріля 2023 р.

Анна Горощак радном Містецкой Рады в Хоцянові

В неділю, 16. квітня/апріля, проходили дополнюючы выборы до Містецкой Рады в Хоцянові, в котрых брали участ жытелі тзв. місцевого 11 выборчого округу. В выборах перемогла наша краянка Анна Горощак (з д. Шпытко), яка была кандидатком з Михалова, Жабіц і Оґродзіска. Конкурентом Анны Горощак был Войцєх Арндт. Горощак за своі пріоритетовы цілі поставила початок будовы дорогы на ватряне поле в Михалові, де каждого рока проходит Лемківска Ватра на Чужыні, ревітализацию пляцу забав в Жабіцах і окремо будову дорогы і пляцу забав в Оґродзісках. Нова радна активно діє серед лемківской громады в Михалові, веде церковный хор при місцевій православній парохіі. Од 2021 р. єст членом Головного Заряду Стоваришыня Лемків. Ґратулюєме!

Метрикальны книгы з західньой Лемковины

Тыжден тому, 13. квітня/апріля др габ. Олена Дуць-Файфер, проф. ЯУ, подала ся зо своім выкладом до Фльоринкы, де в місцевій школі представила ученикам основны інформациі о Лемковині і єй жытелях. Оповідала тіж о присутности Русинів в самій Фльоринці, якы до Акциі «Вісла» становили більшіст жытелів того села. Вчас прелекциі місцевый римокатоицкій парох на рукы др габ. Олены Дуць-Файфер передал безцінны метрикальны книгы – найстаршы з них походят з ХVIII ст. Сут то парохіяльны записы з Береста, Перункы, Камяной і Полян. Документы хвилю по 1947 р. мали быти задля диспозициі Ґрибівского Староства спалены. Щестливо были сохранены через добрых люди. Документы будут тепер певністю забезпечены і детально досліджаны.

Адміністрацийна революция на Словациі?

Конец окремого Пряшівского і Тренчаньского Краю, близко о половину меньше окресів, а выникнутя соспільных сельскых урядів. То пропозиция о новым територияльным діліню Словациі. Документ выникнул в Міністерстві Внутрішніх Справ Словацкой Республикы, но офіцияльно ресортом затля не был представленый. Міністерство, подля доступных інформаций, ждало і на результаты списуваня з 2021 р., котры при творіню новой мапы взяло до увагы. Кєд бы так пропозиция была принята точно як в документі, Словация бы уж мала лем пят краів. Прикладово тзв. Выходословацкій Край выникнул бы через злучыня Пряшівского і Кошыцкого Краів. При адміністрацийній реформі треба дати звіданя і права нацийональных меншын, кєд же теперішній поділ дає меншынам шырокы локальны права. На Словациі тепер меншыны, кєд єст іх 15% населіня, мают забезпечены своі языковы права, значыт можут хоснувати свій язык на урядах, не лем в рамках міст і сел, але і на рівни окресів. Русинны на тот момемтн мают два такы окресы – Меджелабірці і од марця т.р. Свидник. В вересни/септембрі на Словациі будут проходити парляментарны выборы – певно товды тема поділу верне.

Bank of America 2023 Art Conservation Project Grant

Музей Енді Варголя в Пітсбурґу остал єдным з бенефіциєнтів Bank of America 2023 Art Conservation Project Grant. Дофінансуваня буде схоснуване, жебы провести консервацию образів Варголя з сериі Oxidation. Зроблят і хімічну анализу колекциі, жебы рішыти ідеальны условія експонуваня і триманя тых образів. Консерваторскы роботы на найвекшым образі з сериі Oxidation будут проходити в самій ґалериі – публика буде могла видіти цілый процес. Додатково на місци будут до почытаня материялы поясняючы штуку консервациі образу. Bank of America’s Art Conservation Project од 2010 рока підперат охорону образів, різб ци археолоґічных творів о стратеґічным значыню для культуровой спадковины і істориі штукы. Веце як 237 проєктів з 40 держав веденых нон-профітовыма орґанізациями достало дофінансуваня на консервацию історичні ци культурово важных творів штукы, котрым горозит знищыня.