Сумар дня 23. квітня/апріля 2024 р

Приносиме вам сумар медияльной ґрупы ЛЕМ.фм+ на ден 23. квітня/апріля 2024 р.

Директор Реґіональной Дирекциі Державных Лісів стрітил ся з членами соспільной ґрупы охороны долины Вислокы в Радоцині

Початком квітня/апріля директор Реґіональной Дирекциі Державных Лісів Пьотр Кемпф принял запрошыня соспільной ґрупы охороны долины Вислокы і приіхал до Радоцины, жебы в терені омовити проблемы той обшыри. В стрічы участ взяли представникы локальных орґанізаций діючых для охороны природы і лісничы Лісництва Радоцина. В часі спільной дискусиі порушено важны для Низкого Бескіду квестиі. Бесідувано м.ін. о одкрытю резервату «Джерела Вислокы» в особливо цінных лісах Лісництва Радоцина. Рішено, што будуваный Еко-Парк не буде освітляный ночом, в звязку з охороном перед занечыщыньом світлом. Додатково зо страны РДДЛ тема Еко-Парку буде підданя анализі в контексті будучности його мериторичного проґраму. За активістами – нова атракция винна быти хоснувана до загальной едукациі зрыхтуваной при спілпрацы з орґанізациями і незалежныма едукаторами. Державны Лісы задеклярували, што не плянуют дальшого розвитку дороговой інфраструктуры ани фінансовой підпоры самоурядовых інвестиций того рода. Пьотр Кемпф поінформувал, што протягом двох місяців плянує дальшу візиту в Радоцині і товды буде хотіл одповісти на рішены квестиі тыкаючы плянуваного резервату в обшыри Выжньой Радоцины, лісів обнятых мораторийом та проґраму Еко-Парку.

30 років од обновліня Общества імени Александра Духновича

В суботу 20. квітня/апріля в Мукачівскій Містецкій Центральній Бібліотеці ім. Александра Духновича одбыла ся святочна подія, котром припомянула собі русиньска громада Підкарпатя 30 років од обновліня Общества імени Александра Духновича. Серед присутных были м.ін. Юрий Продан – голова Закарпатского Областного Научно-Культуролоґічного Общества ім. А. Духновича, Юрий Шыпович – голова Русиньского Культуролоґічного Клюбу, ци Євген Жупан – голова Народной Рады Русинів Закарпатя. Участникы зложыли вінец під памятником Духновича на фасаді бібліотекы. Общество было основане в 1923 році в Мукачові на стрічы понад 160 русиньскых активістів, єднак свою діяльніст мусіло закінчыти в 1944 р. Реактивация Общества зачала ся початком 90 років ХХ ст. Більше на тоту тему прочытате в дописі на нашым портали.

Вєслав Вабік буде новым бургомайстром Польковиц

В Польковицях выбрали нового бургомайстра, остал ним Вєслав Вабік. В другій турі самоурядовых выборів свій голос оддало на него понад 62% жытелів Польковиц. Вєслав Вабік то знана в Польковицях персона і самоурядовця з долголітнім досвідом. Был найдолше урядуючым бургомайстром Польковиц, свою функцю полнил 12 років, од 2006 до 2018. Серед своіх досягнінь з часів полніня функциі, разом зо спілпрацівниками, вымінят м.ін. одкрытя економічной зоны. На надходячу каденцию заповіл діяня в обшыри мешканьового будівництва, новых місц працы ци підпоры для охороны здоровля.

Спільне прятаня Низкого Бескіду!

В суботу 27. квітня/апріля в ґміні Устя Рускє і ґміні Ропа мож буде взяти участ в спільным прятаню Низкого Бескіду. То незалежна ініциятива жытельок обох ґмін, Марлены Мозьдзіньской і Каролины Рыдарович. В суботу в годинах од 11.00 до 14.00 мож буде ся зголошувати по мішкы до Ґмінного Осередка Культуры в Устю Рускым або до Марлены Мозьдзіньской в Ропі і прилучыти ся до прятаня. Загальна концепция єст така, жебы каждый того дня перешол ся на спацер в своім селі і одраз позберал смітя. Разом дбайме о порядок!

Фот. Stowarzyszenie Doliny