Сумар дня на 11. червця/юнія 2026 р.

Приносиме вам сумар медияльной ґрупы ЛЕМ.фм+ на ден 11. червця/юнія 2026 р.

35. років од І Світового Конґресу Русинів

Уж заран в Меджелабірцях зачнут ся празднуваня 35. річниці од І Світового Конґресу Русинів. Русиньска Оброда на Словациі во спiлпрацы зо Світовым Конґресом Русинів, Світовом Радом Русинів i містом Меджелабірці зрыхтувала святкуваня Дня Русинів Словациi, што будут получены і з празднуваньом Дня Русинів Словациі. Як раз Меджелабірці сут місцьом, де в 1991 р. одбыл ся першый Світовый Конґрес Русинів. Святкуваня зачнут ся о год. 19:30 в просторах АРТ Готелю, де одбуде ся бесіда під назвом «Прямы участникы І Світового Конґресу Русинів в Меджелабірцях». Пак, в собуту од 9:00 год. плянуваны сут дальшы подii, м.iн.: конференция, процесия в кроях, ґаляпроґрам в амфітеатрі, показ фільму «Потопа» i стріча з творцями і акторами. Недільный проґрам завершыт святочне засіданья Світовой Рады Русинів і Божественна літургія. Орґанізаторы просят на подiю вшыткых Русинів, любителів русиньской культуры, фольклору, істориі і традиций.

Русиньскій Музей змінит своє місце

Словацкій Нацийональный Музей дочасно перенесе Музей Русиньской Культуры в Пряшові з теперішньой будовы, де колиси были касарні, до інчых просторів, котры має ресорт культуры в рамках міста. Потвердила тото ґенеральна директорка СНМ Вєрослава Бернатова. За єй словами технічный стан будинку, в котрым є музей, не є добрый. Директорка поінформувала і о поставленым вопросі перенесіня музею до Меджелабірців. Зміны в Музею Русиньской Культуры почали діяти ся в жолтни/октобрі минулого рока, коли была з дня на ден одкликана директорка Люба Кральова, яка была во функциі од серпня/авґуста 2019 р. Проти можливому перенесіню Музею до Меджелабірців є Русиньска Оброда на Словациі. Вопросом тым занимало ся і майове засіданя Округлого Стола Русинів Словациі.

Чемпіонат Польщы на Маластівскій Маґурі

В днях 12.-14. червця/юнія на Лемковині, в околицях села Маластів, одбуде ся 5. і 6. Рунда Гірского Автомобільного Чемпіонату Польщы. Пройде він на Маластівцкій Маґурі і в околицях. В змаганях возме участ 79 участників, што буде рекордовым чыслом в подіі орґанізуваній Бічскым Автомобільом. Траса чыслит 3610 метрів. Патронат над подійом тримат Маршалок Малопольского Воєвісдтва Лукаш Смулка. Треба памятати, што дорогы в околичных лемківскых селах (Маластів, Панкна, Крива, Вірхня, Ґладышів), можут быти на даякій час заперты.

Продолжат будова басену в Санковій

Як інформує ґміна Санкова, продолжают роботы при будові басенового комплексу в Санкові. Всередині обєкту кладена є електрична інсталяция, монтує ся вентиляция та тырвают декорацыйны роботы. З каждым тыжньом видно штораз барже кінцьовый образ інвестициі. В комплексі найде ся рекреацийный басен з водныма атракциями, тор до наукы плываня, зъізджальня, зона для наймолодшых, реляксацийны ванны та окрема зона SPA з сухом, паровом і інфрачервеном сауном і солянковом інгаляторийом з ґротом. Хоц перед будівничыма іщы вельо роботы, уж днес видно, же новый обєкт стане ся важным місцьом одпочынку, рекреациі та стріч для жытелів ґміны Санковы і туристів.