Сумар дня на 12. червця/юнія 2026 р.

Приносиме вам сумар медияльной ґрупы ЛЕМ.фм+ на ден 12. червця/юнія 2026 р.

Святкуваня Дня Русинів Словациі вєдно з 35. річницьом основаня Світового Конґресу Русинів

В найблизшый вікенд Меджелабірці станут ся центром русиньского жытя на Словациі. Русиньска Оброда во спілпрацы зо Світовым Конґресом Русинів і інчыма партнерами просят на цілонародне святкуваня Дня Русинів Словациі вєдно з 35. річницьом основаня Світового Конґресу Русинів. Проґрам святкувань зачне ся днес вечером бесідом з участниками першого Конґресу в 1991 році. В суботу одбуде ся конференция присвячена істориі і перспективам русиньского руху, а пополудни містом пройде кройова процесия. Артистичный ґаляпроґрам одбуде ся в містным амфітеатрі. Святкуваня завершат ся в неділю Божеском Літургійом і засіданьом Світовой Рады Русинів. Орґанізаторы просят вшыткых Русинів і любителів русиньской культуры до спільного святкуваня. Вступне на подіі дармо.

Охорона лісовой біоріжнорідности карпатского погранича

В рамках проґраму Інтерреґ Польща – Словация 2021-2027 зреализує ся дальша польско-словацка ініциятива, направлена на охорону карпатской біоріжнорідности. Партнером проєкту з польской страны сут Державны Лісы – Надлісництво Лося, а зо словацкой: Нацийональный Лісовый Центр і Лісы Словацкой Республикы, державне підприємство. Головным заложыньом ініциятивы «BIOBRIDGE PL-SK – Зеленый міст: Охорона лісовой біоріжнорідности карпатского погранича» єст ратуваня і одбудова найбарже загороженых і рідкых дерев в лісах Низкого Бескіду, особливо тиса і ялиці. Завдякы унійным середкам до лісів трафит аж 10 тис. новых саджінок, а найціннійшы становиска загороженых дерев будут загороджены. Окрем того науковці збадают DNA дерев, жебы в будучым выбрати найміцнійшы одміны, а тіж схоснуют термальны дроны, лясерове скануваня і сателітарны знимкы до скорой оціны здоровля дерев і борбы зо шкідниками. В рамках проєкту по обох странах границі возникнут природничы едукацийны стежкы, будут зорґанізуваны варштаты і свято «Ден тиса». Дофінансуваня з Европейского Фонду Реґіонального Розвитку то понад 1,1 млн евро. Проєкт потырват до кінця мая 2028 рока.

Дальшы крокы в справі одкрытя Музею Східнього Фронту І Войны в Ґорлицях

Якісый час тому інформували сме о плянах основаня Музею І Світовой Войны в Ґорлицях. В лютым/фебруарі тр., підчас Европейсого Форуму Спадковины І Світовой Войны был підписаный лист підпоры для основаня реченого музею. Од того часу справа ся розвинула. Як інформувал початком того тыжня бургомайстер Ґорлиц Рафал Кукля, в Міністерстві Культуры і Нацийональной Спадковины одбыла ся стріча з міністром в тій справі. Были на ній представлены заложыня проєкту Музею Східнього Фронту І Войны та бесідувано о можливостях одкрытя музею і формулах його ведіня.

Дебата о актуальным стані культуры і языка Лемків в Державным Етноґрафічным Музею в Варшаві 

Припоминаме, што о нецілы два тыжні, в четвер 25. червця/юнія в Державным Етноґрафічным Музею в Варшаві пройде выняткова стріча – бесіда, што тыкала буде актуального стану культуры і языка Лемків. Буде она рефлексийом над дідовизном і сучасном присутністю Лемків/Русинів в европейскій культурі. В бесіді возмут участ: Оксана Ґрабан-Ліхтаньска, Наталия Малецка-Новак, Лідия Стефановска, Юрий Стариньскій і Михал Шымко. Подію поведе др габ. Пьотр Маєвскій. Участ в дебаті єст безплатна, треба лем побрати дармовы білеты, доступны на інтернетовым сайті музею. Тым, котры іщы не виділи выставы «Формы присутности. Штука Лемків/Карпатскых Русинів», припоминаме, што буде она вказувана в Варшаві іщы лем до кінця того місяця.