Сумар дня 24. квітня/апріля 2024 р

Приносиме вам сумар медияльной ґрупы ЛЕМ.фм+ на ден 24. квітня/апріля 2024 р.

Свято і нагороды в Ґорлицях

В суботу 20. квітня/апріля, Акафистову Суботу (Похвалу Пресвятой Богородиці), пяту суботу Великого Посту, в православній катедральній церкви св. Тройці в Ґорлицях служена была архієрейска літургія, котру очелювал владыка Паісий, архієпископ перемышльско-ґорлицкой єпархіі, участны были священникы ґорлицкого і креницкого деканатів. По літургіі служеный был перед Привратницьом акафист до Пресвятой Богородиці. Праздник был тым векшый, што докладні перед десятьома роками была внесена до катедральной церкви копія Іверской Іконы Богородиці зо Святой Горы, горы Афон. Владыка Паісий, вчас малого входу, нагородил двох священників признаныма Собором Єпископів Польской Автокефальной Православной Церкви пасхальныма нагородами. О. митр. Василь Ґалчык отримал другій наперсный крест, зас о. Андрий Ґрич остал удостоєный правом ношыня митры. О. митр. Василь Ґалчык был першым парохом ґорлицкой парохіі, за його душпастырюваня была вознесена ґорлицка церков. В тым самым часі душпастырювал в Креници. Тепер є резидентом парохіі в Ґорлицях. О. митр. Андрий Ґрич принял слова узнаня вєдно з нагородом за труд, якій вложыл в будову новой церкви в Білянці, довершеного ремонту церкви в Кунковій і за церков в Ліщынах, ктору тепер ремонтуют.

Книжка о акциі «Вісла» номінувана до нагороды

Як раз вчера, в Медженародный Ден Книжкы і Авторскых Прав, капітула Літературной Нагороды Варшавы оголосила номінуваны до нагороды публикациі. Серед пятнадцетерох номінуваных нашла ся Мария Стшелецка і єй найновша книжка – «Гайда. Бескід без кіту». Як подало в поясніню жырі конкурсу: «Авторка бесідує з непамятю, вслухує ся в істориі оповіданы бескідскым пейзажом, облікат в тіло тіни Лемків, што мешкали гын перед выселінями. Дозвалят почути любов до місця, котрого єст ся частю – та доімуючый біль його втраты». Книжка і єй авторка были номінуваны в катеґориі дітячой літературы. Результаты будут поданы в червци/юнію. Орґанізатором конкурсу єст місто Варшава. До тогорічной едициі было зголошеных аж 755 книжок, з чого 149 публикаций для діти.

Матуру з лемківского языка буде здавало двох школярів

Неодолга зачнут ся тогорічны матуры. Такой по Великодни за старым календарьом, в віторок 7. мая пройде першый еґзамін – обовязковый іспыт з польского языка, а уж на другій ден, по обовязковым іспыті з математикы, пройде писана матура з лемківского языка. Того рока до еґзаміну з рідного языка плянує підыйти двох учеників. Вшыткы писемны еґзаміны кінчат ся 24. мая, кєд бы были охочы, то медже 20. а 25. мая мали бы пройти бесідуваны еґзаміны з кашебского і лемківского. Того рока нихто не рішыл здавати бесідуваной части з лемківского языка. В рамках той части еґзамінаторы могли бы звідувати о ріжны квестиі тыкаючы выбраных творів і поміщыня іх в шыршым контексті, авторства м.ін. Клавдиі Алексович, Михала Нестрака, Владиміра Хыляка, Ваня Гунякнкы, Івана Русенка, Симеона Пыжа, Семана Мадзеляна, Мариі Мальцовской, Івана Желема, Андрия Копчы, Павла Ксенича, Павла Коробчака, Володислава Грабана ци Петра Мурянкы. То аж 50 шырокых звідань, до котрых мусіли бы ся рыхтувати охочы здавати матуру з лемкіского языка, попри писаній части, котру сут зобовязаны здавати на пошыреным рівни.

Рондо в Польковицях праві скінчене

Мож уж переміщати ся во вшыткых напрямах на новопобудуваным ронді в Польковицях, зробленым при скрижуваню воєвідской дорогы но 333, Алеі Яна Павла ІІ, Алеі Юзефа Пілсудского і улици Кардинала Болеслава Комінка. Ведены сут іщы фінальны роботы – ознакуваня, порядкуваня, зато рекомендувана є фурт звекшена осторожніст. Інвестиция реализувана є в трибі «запроєктуй і будуй» од 2021 рока. Кошт не перекрочыт 5 млн зл. Нижньошлезскє воєвідство передало на тоту ціль 1,7 мнл зл.