Сумар дня 27. марця 2023 р.

Приносиме вам сумар медияльной ґрупы ЛЕМ.фм+ на ден 27. марця 2023 р.

В Виноградові одсвяткували сотну річницю основаня Общества ім. Александра Духновича

Як інформує сайт Центра культур нацийональных меншын Закарпатя, в суботу 25. марця в Виноградові одбыло ся святочне засіданя з нагоды сотной річниці основаня Общества імени Александра Духновича. Орґанізатором подіі было Закарпатскє областне науково-культуролоґічне Общество ім. Александра Духновича. На стрічы выступили Юрий Продан – голова Общества, Юрий Шыпович – голова Русиньского културолоґічного клюбу, Євген Жупан – голова Народной рады Русинів Закарпатя, Михаіл Чухран – русиньскій писатель і голова районного центра общества і дальшы. Присутный был і Олександр Лях, заступник директора одділіня – начальник управліня нацийональности і реліґій одділіня стратеґічных комунікаций, нацийональости і реліґій Областной державной адміністрациі.

«Basquiat x Warhol. Painting 4 hands»

Уж в будучым тыжни, в середу 5. квітня/апріля буде одкрыта унікатова выстава зрыхтувана Фундацийом Louis Vuitton, яка є зачысляна до найважнійшых і найцікавшых, якы ся одбудут того рока на світі. Іде о выставу, на якій запрезентуваны будут спільны працы двох вызнаных артистів Жана Мішеля Баскія і Енді Варголя. В роках 1984-1985 створили они спільно близко 160 образів в тандемі «à quatre mains» – в штырі рукы. Як подає орґанізатор, «Basquiat x Warhol. Painting 4 hands» збере понад триста прац і документів, в тым 80 полотен підписаных спільно обома артистами. Представлены будут і окремы працы другых вызначных американьскых артистів того періоду, што має на ціли пробудити енерґію нюйоркской артистичной сцены 80. років ХХ столітя. Выстава буде доступна до 28. серпня/авґуста в парку Bois de Boulogne в Парижы.

В Креници побудуют водный пляц забав

Як подал бургомайстер Крениці Пьотр Рыба, в минулу пятницю были одкрыты оферты на будову водного пляцу забав на цдПарковій Горі. Кошт інвестициі не перекрачат квоты 6 млн 900 тис. злотых і має позволіня на будову. Догваріня буде підписане в квітни/апріли, а будовляны працы зачнут ся безпосередньо по закінчыню ІІІ Европейскых Ігр Краків – Малопольща 2023, т.є. в липци/юлию тр. В рамках інвестициі буде побудуваный водный пляц забав разом зо скеледромом, зовнішньом силовньом, лавками, алейками, мініамфітеатром, місцьом до рекреациі і кавярньом. Збогатит то оферту загорід сил натуры, де окрем тематичного ґратя до досвідчынь находят ся уж м.ін. і видокова плятформа, спацеровы алейкы, ци мініятуры характеристичных креницкых будинків. Для поправы комфорту, в рамках інвестициі буде перебудувана і дорога до загорід.

Остатня шанса выстартувати в конкурсі «Карпатскы локальны ініциятивы»

Іщы лем до пятниці 31. марця мож складати внескы до конкурсу «Карпатскы локальны ініциятивы» орґанізуваного Стоваришыньом Pro Carpathia. Цілю конкурсу єст заінтересувати та заанґажувати молоды орґанізациі і неформальны ґрупы через реализацию проєктів звязаных з культуровом і природничом спадковином карпатского реґіону. До конкурсу мож зголошувати проєкты, котры тыкают підтримуваня традиций, розвитку нацийональной і громадяньской свідомости, анґажуваня жытелів державы до спільной реализациі та промуваня проеколоґічного думаня. Пуля дотациі то аж 350 тис. зл, котра допоможе в реализациі 35 карпатскых ініциятив.