Сумар дня 3. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 3. квітня/апріля 2024 р.

Подипломовы студиі тыкаючы Ромів – єднак не на Християньскій Теолоґічній Академіі

В минулый четвер 28. марця Християньска Теолоґічна Академія в Варшаві поінформувала, што не буде одкрывала подипломовых студий тыкаючых Ромів. В комунікаті чытаме, што учельня: «з незалежных од ней причын, резиґнує з признаной дотациі з середків Проґраму соспільной і громадяньской інтеґрациі Ромів в Польщы на рокы 2021-2030 на сустемову задачу пн. Подиплововы студиі тыкаючы ромской соспільности вєдно зо стипендияльным системом для слухачів». Факт, што Міністерство Внутрішніх Справ і Адміністрациі 24. лютого/фебруара тр. рішыло передати дотацию на орґанізацию реченых студий Християньскій Теолоґічній Академіі, выкликал против членів меншыновой страны Спільной Комісиі Уряду та Нацийональных і Етнічных Меншын, а справа была порушана на засіданю Соймовой Комісиі тыкаючой меншын початком марця. Послідніх пару років орґанізацийом студий з ромолоґіі занимал ся Університет ім. Адама Міцкєвича в Познані, занятя вела досвідчена кадра звязана з середовиском Ромів. Перше такы студиі ведены были на Університеті Нацийональной Едукациі в Кракові. На тот момент не знатя, котрый університет займе ся орґанізацийом студий тыкаючых ромской соспільности по резиґнациі Християньской Теолоґічной Академіі в Варшаві. Додати треба, што сут то єдины студиі в Польщы посвячены квестиям звязаным з ромском меншыном.

Лем піше на Креницку Яворину

Од вчера на Креницку Яворину мож достати ся выключні піше, зато же зачал ся технічный перегляд ґондольовой колейкы. Протягом рока такы перегляды сут два – по зимовым сезоні в квітни/апріли і по літнім сезоні – в листопаді/новембрі. Роботы найчастійше тырвают три тыжні, але тым разом потырвают кус долше, бо до 27. квтіня/апріля. Веденый буде так званый специяльный перегляд. Креницка Яворина то другій найвысшый верх Сандецкого Бескіду, його высокіст то 1114 м н.р.м. Найкороша дорога на верх веде через лыжню трасу, але є барз спадиста, лагіднійшый пут од нижньой стациі веде зеленым шляком, єст долгій на 3 км. В тым місяци пройде тіж технічный перегляд колейкы на Парокову Гору в Креници – буде веденый од 15. до 26. квтіня/апріля.

В Яслі зміна орґанізациі руху в звязку з ремонтом мосту

Зачала ся перебудова мосту через Вислоку на улици Крайовіцкій в Яслі. Міст долго был уж в планным стані, од років обовязувал гын змінный рух, з причыны конечности зменшыня обтяжыня конструкциі. На час будовляно-модернізацийных робіт зрыхтувана є часова орґанізация руху. Вызначены сут три обіздовы трасы – дві для позідів о масі до 30 тон і єдна для поіздів до 3,5 тоны. По ремонті мосту дорога вєдно з пішниками буде мала 9,5 метра шырокости. Буде на ним верненый рух в обі страны.

Нове авто для Ратівничо-Протиогньовой Єдиниці в Польковицях

Неодогла Повітова Коменда Протиогньовой Стражы в Польковицях буде могла закупити новый ратівничо-розпознавчый поізд. На тоту ціль власти ґміны передали чек на 200 тис. зл. Заступця бургомайстра Кжыштоф Нестер подал, што сут то найважнійшы інвестициі для каждого самоурядовця, бо звязаны з безпеком жытелів ґміны і повіту. Авто, якє буде закуплене медже інчыма завдякы підпертю ґміны Польковиці, то легкій специяльный ратівничо-розпознавчый поізд. На тот момент Ратівничо-Протиогньова Єдиниця диспонує пятьома бойовыма автами, в тым єдным з 41-метровом драбином.