Сумар дня 4. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 4. квітня/апріля 2023 р.

Малопольща підтримує культуру

Першы два конкурсы в тым році «Меценат Малопольщы» та «Меценат Малопольщы БІС» сут уж закінчены, а власти воєвідства подали тогорічных бенефіциєнтів. Як передала єдна з представничок воєвідского заряду, конкурс тішыт ся штораз більшом популярністю. Того рока чысло зголошынь зачудувало орґанізаторів і з той причыны рішыли піднести пулю грошів презначену на фінансуваня до 4 млн зл. Дотацию отримат близко половина зголошеных внесків, бо аж 224 задачы. Цілю конкурсу єст збогатити культуральну оферты Малопольшы, розвиток і промуваня культуры та інтеґрация жытелів. Серед тогорічных выбраных задач, сут тіж тоты реализуваны на Лемковині, нп. «Вакацийна стріча з опером» в Реґєтові. Фінансову підпору на реализацию проєкту Творча Інтерпретация традиці «Словом і музиком» отримало Стоваришыня Промоциі Лемківской Творчости «Серенча». Другій з конкурсів «Меценат Малопольщы БІС» підперат цикличны задачы. В його рамках признано 38 дотаций на квоту 2 млн зл,з чого част буде реализувана того рока, а част в 2024.

В Санковій тырвают рыхтуваня до тогорічной реконструкциі Бітвы під Ґорлицями

По пандемічній перерві вертат акция «реконструкциі Бітвы під Ґорлицями», орґанізувана Ґорлицком Реконструкцийном Ґрупом 1915. Подія одбуде ся 2. мая вздолж воєвідской дорогы в Санковій. Тогорічна едиция реконструкциі буде мала єднак кус інчый характер. Як заповідают орґанізаторы, в тым році головном темом буде штоденне жытя мешканців Ґорлиц в часі войны. Участ в подіі возмут локальны театральны ґрупы і зголошены реконструкцийны ґрупы. Закля што орґанізаторы не представили сценария, але на пляні реконструкциі видно уж першы части сценоґрафіі: єст уж хыжа, будувана єст корчма і торґ, а помедже окопы.

«Сила Карпат»

В остатній ден марця прошла премєра фільму «Сила Карпат». Ідея зрыхтувати на тоту тему фільм вказала ся по Волошскым Дискусийным Панели – Міты та Реальніст, котрый прошол 17. грудня/децембра минулого рока в Татряньскым Музею, в рамках Фестівалю «Сила гір». Реализацийом фільму заняли ся орґанізатор проєкту Стоваришыня Стрічы з Гірскым Фільмом разом з партнерами, м.ін. Стоваришыньом Res Carpathia. Участ в проєті взяли бадачы з цілой Польщы, котры одповідают на звіданя: кым сут Волохы, одкале пришли, а тіж розповідают о іх достоменности і культурі. Фільм мож видіти на інтернетовым сайті Стоваришыня Res Carpathia.

Малярскы Таємниці Єжы Новосільского

Днес в просторах Музею Сучасной Штукы MOCAK в Кракові пройде подія «Малярскы Таємниці – стріча посвячена творчости Єжы Новосільского», котрый єст патроном 2023 рока. Подія пройде при одкрытю новой выставы «Артисты з Кракова. ІІ Краківска Ґрупа», котрой членом был тіж Новосільскій. Презентуваны працы приятелів артисты будут пунктом однесіня до малярства Новосільского. Додатково участникы акциі будут видіти Бібліотеку Мєчыслава Порембского, де находят ся даруваны артистом образы. До выставы долучат ескізы Новосільского з приватного архіву Порембского. Стріча пройде днес о 17.00 год. Вступ єт дармовый, лем треба скорше поінформувати, што хоче ся брати участ.