Сумар дня 8. квітня/апріля 2024 р.

Приносиме вам сумар медияльной ґрупы ЛЕМ.фм+ на ден 8. квітня/апріля 2024 р.

Митрополита Йона стрітил ся з председом і посланцями ПСК

Пряшівскій архієпископ і митрополита Йона стрітил ся в минулый четвер 4. квітня/апріля на Грекококатолицкым Архієпископскым Уряді в Пряшові з председом Пряшівского Самосправного Краю Міляном Меєрскым і посланцями Заступительства Пряшівского Самосправного Краю, котры пришыли там на запрошыня владыкы. Інформувал о тым говорця Пряшівской Архієпархіі Михал Павлишинович. Як подал, «Гості собі посмотріли просторы Архієпископского Уряду і Постійну експозицию істориі Пряшівской Архієпархіі. В архієпископскій капличці святого Йосифа владыка Йона заспівал молитву – великодній тропар Христос воскресе, і то з інтенцийом за вшыткых посланців, іх родины і посланя». Владыка выразил надію на дальшый розвиток спілпрацы грекокатолицкой Церкви і Пряшівского Самосправного Краю.

Креницкій амфітеатр має быти одданый до хоснуваня того літа

Тырвают остатні працы при будові амфітеатру в Креници. Подля першых заповіди нова культурна атракция мала быти готова в маю тр. Актуальный передвидуваный термін одданя інвестициі то 6. липця/юлия. Амфітеатр з авдиторийом рахуючом 1000 місц має быти черговым розвитковым імпульсом Крениці. Фінальный кошт його будовы то близко 20 млн злотых.

Зміна руху на ронді в Польковицях

Ґміна Польковиці інформує о дальшых змінах в руху на ронді. З огляду на реализацию схемы для пятого етапу прац звязаных з перебудовом ронда на скрижуваню Алеі Яна Павла ІІ і Алеі Юзефа Пілсудского та улиці Кардинала Болеслава Комінка, од днес од год. 11.00 буде обовязувала тымчасова зміна орґанізациі руху. На тым етапі робіт буде кладена стеральна верства на західній дорозі і вході на улици Яна Павла ІІ. Вхід од ул. Кардинала Комінка буде одкрытый, рух воєвідском дорогом буде ішол східньом дорогом. Західня дорога і вхід на Алею Яна Павла ІІ будут закрыты. Така схема орґанізациі руху буде обовязувала до четверга 11. квітня/апріля до 17.00 год. Пак од 12. квітня/апріля буде привернена схема для ІІ етапу з можливістю выізду з ул. Кардинала Болеслава Комінка.

Выклад тыкаючый Апостольской Адміністрациі Лемковины

В тым тыжни, в пятницю 12. квітня/апріля в Ґалицийскым Рынку Музею Народного Будівництва в Саноку буде мож послухати выкладу під наголовком «Поставы грекокатолицкого духовенства Апостольской Адміністрациі Лемковины, Лемковины і Перемышльской Єпархіі в однесіню до польской державы і Поляків в передден ІІ Світовой Войны». Выклад выголосит др Ґжеґож Внентшак з Академіі Воєнной Штукы в Варшаві. Початок о 17.00 год.

Дальшы варштаты в Рускій Бурсі в Ґорлицях

Уж в тым тыжни Стоваришыня «Руска Бурса» в Ґорлицях просит діти і молодіж до участи в варштатах робліня квіточків з бібулы, такыx як давно (або недавно) робили нашы бабы. Пройдут они в суботу 13. квітня/апріля о 12.00 год. в Рускій Бурсі. То чергова подія, котра проходит в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты. На Квітну Неділю (за старым календарьом) запрашаме на малюваня писанок традицийном батіковом методом, а о дальшых будеме інформувати в своім часі, будут то м.ін. варштаты ляльок-мотанок ци рыхтуваня традицийных вінців на гробы з сушеного квітя. Інструкторком занять є Олена Дуць. Вступне на вшыткы варштаты дармо – забезпечаме тіж материялы.