Сумар дня 9. мая 2024 р.

Приносиме вам сумар медияльной ґрупы ЛЕМ.фм+ на ден 9. мая 2024 р.

Матура з лемківского языка

Вчера была писана матура з лемківского языка. З нашых інформаций выникат, што матуру писало двох матуристів з Лемковины – Ольга Шевчык і Фома Болех – обоі еґзамін з лемківского писали в Ґорлицях. «Як што рока были дві темы, я выбрала єм тоту порушаючу квестию памяти. Треба было писати на основі поданого тексту, в тым році был то текст Богдана Ґамбаля, і однести ся до інчого твору лемківской літературы» – бесідувала нашій редакциі Ольга Шевчык. «Окрем поданого фраґменту, однесла єм ся до «Бомбля» Мирослава Нагача і до «Місця» Анджея Стасюка» – продолжат. «Я выбрал першу тему. Была то порівнавча анализа на основі двох вершів – Івана Русенка і Нестора Репелы» – реляцийонувал на горячо Фома Болех, матуриста Ансамблю Економічных Шкіл в Ґорлицях. Покля што не знаме, ци дахто в тым році підходил до лемківской матуры на західніх землях. Перша матура з лемківского языка была написана в Ліґници в 2013 р. Тогорічным матуристам з лемківского языка ґратулюєме одвагы і гордости! Желаме успіхів в дальшых еґзамінах.

Новый владыка Мукачівской Єпархіі

Як вчера оголосил Ватикан, папа римскій Франциск призначыл нового єпископа-ординария Мукачівской Грекокатолицкой Єпархіі. Стал ним о. Теодор Мацапула, дотеперішній синкель в справах монашества Мукачівской Грекокатолицкой Єпархіі. Теодор Мацапула так само дотепер был ігуменом чернечого общества блаженного Теодора Ромжы Інституту Воплоченого Слова в Дубовым. Владыка Ніль Лущак, дотеперішній апостольскій адміністратор єпархіі, остане помічным єпископом. Владыка-номінант Теодор Мацапула народил ся 21. серпня/авґуста 1981 р. в Крылосі, ивано-франківской области. В 2007 р. склал вічны обіты. 10. лютого/фебруара 2008 р. был рукоположеный на священника. Од 2008 до 2013 р. был на місиі в Росиі, де старал ся о католиків візантийского обряду. В 2018 р. отримал званя бакалавря гуманітных наук, в 2022 р. ліценцият посторального богословя. Бесідує по італийскы, іспаньскы, польскы і росийскы.

Вмер Іван Мадзік

4. мая вмер єден з нашых еміґрацийных лемківскых діячів – Іван Мадзік. Покійный вродил ся в 1935 р. в Бортным. По выгнаню в рамках акциі «Вісла», в 1966 р. подал ся за ліпшым жытьом до Австралиі, а в маю 1969 р. прибыл до Зъєднаных Штатів Америкы. Іван Мадзік досліджал історию Лемковины, а предовшыткым свого рідного села – Бортного. Зобрал цінну бібліотеку і артефакты, якы служат теперішнім дослідникам Лемків в Америці. Мадзік через долгы рокы был членом Ґрупы Славістичных Студий на Southern Connecticut State University. Активно анґажувал ся в жытя православной Церкви в ЗША. Гордо підперал Лемко-Союз, єдну з нашых найстаршых лемківскых орґанізаций, реактивувану по роках. В Лемко-Союзі полнил м.ін. функцию скарбника. Вічна Йому Памят!

Зміна власти в Польковицях

Вєслав Вабік, якій є новым бургомайстром Польковиц, покликал особы на єдны з найважнійшых фунций в уряді ґміны. На становиско заступці бургомайстра дс. економічных покликаный был Себастиян Сипко. Новым секретарьом ґміны Польковиці є Мажена Олейнік. То покля што першы персональны номінациі нового бургомайстра. Быти може в дальшых днях оголошены будут наступны особы, якы обнимати будут другы становиска.