Сумар дня на 05. мая 2020 р.

Приносиме вам сумар медияльной ґрупы ЛЕМ.фм+ на ден 05. мая 2020 р.

Вздолж Долины Попраду на ровері

Недавно інформували сме о новых біциґльовых трасах в Креници. Не єст то іщы конец добрых новин для любителів активного выпочынку в Малопольщы. До кінця червця/юнія зреалізуваный буде остатній, рахуючый 12 км одтинок полудньовой роверовой трасы EuroVelo 11, якій іде вздолж Долины Попраду. Траса Мушына-Новый Санч рахує близко 45 км. Выріжнят ся не лем красныма краєвидами, але, што інтересуюче, веде раз по польскій, а раз по словацкій страні Попраду. Ґміна і місто Мушына разом зо своіма полудньовыма сусідами по спільных бесідах тыкаючых проблему переправы через воду рішыли выбудувати дві лавкы над ріком. Припоминаме, же в Малопольщы реалізуваный єст найбільшый проєкт будовы біциґльовых трас з европейскым стандардом VeloMałopolska. Уж тепер до хоснуваня оддано близко 600 км трас з такым стандардом і більше як 3000 км роверовых пути.

Благодійна діяльніст в дакус іншый спосіб

Вчера свою благодійну діяльніст зачала Ізабеля Заторска, польска легкоатлетка, што специялізує ся в гірскых бігах, яка наштоден робит як учытелька в І Загальноосвітнім Ліцею в Коросні, а по годинах і в свобідным часі тренує до змагань. Єй улюблене місце до тренуваня то Цергова – гора положена близко Дуклі в Низкым Бескіді. Заторска рішыла свій тренінґ выкорыстати до помочы локальному шпытальови в Яслі, де потрібуют грошы, жебы купити апарат штучного дыханя. Так возникли Благодійны Бігы на Цергову, де через 7 дальшых дни Ізабеля Заторска буде выходила на верх горы. Два першы бігы має уж за собом. В рамках акциі плянує ся зобрати 50 тис. зл. Єст то кошт закупу апарату. Цергова то єдна з барже інтересуючых гір находячых ся в Низкым Бескіді. Звязана єст з вельома леґендами і народныма оповіданями. Хоц траса на верх єст дост коротка, близко 2,5 км, то єст вынятково обырвиста. Акция промувана єст в медиях і тішыт ся великом популярністю. Пінязі можна вплачати на конто коросняньского Фонду Одкрытых Серц імени Боґуславы Никєль-Островской.

Што дале з Сандецкым Замком?

Зас єст голосно о Сандецкым Замку. В остатнім часі на Замковій Горі в Новым Санчы ведены были сондажовы досліджыня. Мали они на ціли вказати, в якым стані заховали ся фундаменты королівского замку. В часі першого выкопу ґрупа археолоґів вела досліджыня в місци выбуху в 1945 р., коли замок потерпіл найбарже. Окрем фраґментів ґратя ци кафлів дослідникы нашли м.ін. мармурову основу для колоны ци пару монет. Як бесідувал Бартломєй Урбаньскій, сут то дрібниці, котры дают археолоґам барз дуже цінных інформаций на тему жытя на замку і його істориі. Проведены досліджыня то вступ до быти може будучой одбудовы замку. Думка о такій інвестициі явиля ся минулого рока осіню з ініциятивы Сандецкой Аґенциі Реґіонального Розвитку і президента міста Людомира Гандзеля. Серед арґументів за одбудовом представлено розвиток туристикы ци підтримуваня локальной памяти. Спостережено тіж, же был бы то переломный момент в істориі міста. Королівскій Замок выбудуваный Казімєжом Великым то гордіст Нового Санча – як бесідує президент міста.

Стоп пожарам трав

Великій проблем польскых пожарників. «Стоп пожарам трав» то дальша уж едиция шторічной кампаніі Головной Коменды Державной Пожарничой Стражы при підпорі Державных Лісів та Міністерства Внутрішніх Справ і Адміністрациі. На офіцийным сайті акциі находят ся статистикы з попередніх років і інформациі о правных результатах выпаляня трав, а тіж економічных наслідствах пожарів. Треба о тым памятати, особливо тепер – в так сухым часі, де выпаляня трав єст великом небезпеком для лісів, але тіж і люди. Влони однотувано близко 56 тис. пожарів лук і земель, што становило 36,4% вшыткых пожарів.