Сумар дня на 1. червця/юнія 2022 р.

Приносиме вам сумар медияльной ґрупы ЛЕМ.фм+ на ден 1. червця/юнія 2022 р.

Лемкы в Америці одзначыли 75. річницю Акциі «Вісла»

Лемківскы еміґрацийны кругы одзначыли 75. річницю выселіня Лемків в рамках Акциі «Вісла». Подія проходила в неділю, 15. мая 2022 р., в Йонкерс, штаті Ню Йорк. Подія была зорґанізувана еміґрацийным діячом Андрийом Медвідьом, а фінансову підпору дал Карпаторусиньскій Америцкій Центр.  Наголовок подіі – памятаме і не забудеме – был придуманый Медвідьом так, жебы вказати, што памят про тоту траґічну подію є жыва серед лемківской еміґрациі і буде передавана дальшым поколіням, што уж родят ся на американьскій земли. Подія зачала ся панихідом в православным храмі св. Тройці в Йонкерс, якій находит ся в юрисдикциі Православной Церкви в Америці. Пак о. діякон Давид Дутканич розповіл о обставинах Акциі «Вісла» і о лаґрах в Талергофі і Явожні. Голос мал і Василь Барна, якій гварил о психічных і фізичных пережытях выселяных, якы почул од свого покійного няня. Як повіл Андрий Медвід, был він позитивно здивленый великым чыслом участных і іх зацікавліньом.

В Сербіі стрічали ся меншыновы совіты

Як інформувала аґентура Рутенпрес, в пятницю 27. мая тр. в Палаци Сербіі в Бельграді одбыла ся стріча Координациі Нацийональных Совітів. В стрічы брали участ представникы вшыткых вызнаных в Сербіі нацийональных меншын. За Русинів был участный Борислав Сакач, предсідатель Нацийонального Совіту Русинів. Найважнійшым пунктом проґраму было списуваня жытелів, котре буде проходило в Сербіі аж тот рік осіню, кєд же было перенесене з причыны пандеміі. В тот сам ден засідал і Совіт Республикы про нацийональны меншыны. Участны были вшыткы 22 нацийональны совіты і жыдівскы представникы. Премєрка Сербіі Анна Бырнабіч представила дакілько актинвости, важных в слідуючым періоді про нацийональны совіты. Припомянула, же в червци/юнію буде закінчене творіня Акцийного пляну про творіня прав нацийональных меншын, документу підпореного Европейском Унійом і Радом Европы. Бесідувана была і тема перенесіня выборів до нацийональных совітів на пізнійшый термін, жебы не мусіли в єднакым часі проходити дві важны про меншыны кампаніі. Новый термін выборів не был іщы встановленый.

Грекокатолицкє поломництво на св. Гору Явір

В днях од 18. до 22. липця/юлия тр. одбуде ся грекокатолицкє поломництво на св. Гору Явір. Поломникы рушат з Лютины на Словациі, а пак підут через: Ганиґовці, Мільпош, Лучку, Каменицю, Кыів, Шаришскє Ястрябя, Чырч, Грабскє, Курів, Ґабольтів і Ціґельку. В пятницю рано выйдут на св. Гору Явір, де служены будут молебен і понтифікальна Літургія.

Промоция І тому річника «Res Carpathica»

Стоваришыня Res Carpathica і Центральна Гірска Бібліотека ПТТК просят на промоцию І тому річника «Res Carpathica». Стріча пройде в четвер, 9. червця/юнія, о 18 год. в конференцийній сали Центрального Осередка Гірской Туристикы ПТТК в Кракові. Річник «Res Carpathica» складат ся з трьох части: науковой, популярной і хронікарской. Был печатаный Стоваришыньом о тій же назві. Ініцияторы проєкту хотіли сотворити свого родa простір ци лавку, што мала бы лучыти карпатскых творців вшелеякых заінтересувань і языків.