Сумар дня на 1. червця/юнія 2023 р.

Приносиме вам сумар медияльной ґрупы ЛЕМ.фм+ на ден 1. червця/юнія 2023 р.

Кличеме на соспільны консультациі

Припоминаме, што Стоваришыня «Руска Бурса» в Ґорлицях і Стоваришыня Лемків просят на соспільны консультациі в справі вписаня на Державный Спис Нематерияльной Культурной Спадковины лемківского языка і лемківской культуры. Стрічы одбудут ся в Ліґници і в Ґорлицях. Перша, в Ліґници, пройде в середу 7. червця/юнія о год. 18.30 в Collegium Witelona. Друга стріча пройде в суботу 1. липця/юлия о 15.00 год. в нашій Рускій Бурсі в Ґорлицях. Консультациі сут одкрыты для вшыткых Лемків, котры ідентифікуют ся з лемківскым языком і лемківском культуром.

Владыка Юрий принял війта ґміны Рудна

Як інформує православна вроцлавско-щеціньска єпархія, в понедільк, 29. мая архієпископ Юрий стрітил ся в своій сідибі з війтом ґміны Рудна Адрияном Волковскым. Вчас стрічы бесідували о спілпрацы єпархіі з ґміном та рішыли пляны на будучніст. Як пише ся в комунікаті на єпархіяльным вебсайті, великє чысло жытелів ґміны Рудна, што на Нижнім Шлеску, становлят потомны Лемків выселеных гын в рамах Акциі «Вісла», а тіж переселенці зо східніх крайців ІІ Польской Республикы. На обшыри ґміны Рудна фунґуют дві православны парохіі – в Рудній і Студзьонках (тота остатня была такой єдном з першых нашых парохій на землях выгнаня). В гербі ґміны Рудна находит ся св. Катерина Александрийска, котрой памят православна церков одзначат 24. листопада/7. грудня.

Авторскы стрічы з проф. Маґочійом

Початком червця/юнія пройдут дві авторскы стрічы з проф. Павлом Робертом Маґочійом, автором публикациі «Pod osłoną gór. Dzieje Rusi Karpackiej i Karpatorusinów». Перша стріча пройде 6. червця/юнія о 18.00 год. в Інституті Істориі Штукы Вроцлавского Університету. Друга орґанізувана єст Стоваришыньом Лемків 7. червця/юнія в Collegium Witelona в Ліґници і зачне ся о год. 16.30. «Pod osłoną gór. Dzieje Rusi Karpackiej i Karpatorusinów» то бадай перша моноґрафія, в якій находиме історию Карпатской Руси і жыючого там населіня – карпатскых Русинів, дана чытачам в так приступный спосіб. Будут то уж другы того рода стрічы в Польщы. Першы проходили влони в Варшаві, Кракові, Ґорлицях, Саноку і Зындрановій.

Поломничество Розділян на Пряшівску Русь

Грекокатолицка парохія в Розділю і парох о. Григорий Пацан просят до участи в поломничестві під назвом «Лемківскій Шариш». Поломникы будут путувати по Пряшівскій Руси в днях 16.-17. червця/юнія. Проґрам зачне ся выіздом з Розділя. 16. червця/юнія о 18.00 год. уж на Пряшівщыні в церкви в Шаришскым Ястрабі буде одслужена літургія. Поломникы будут ночувати в Лютині. Там рано буде служена літургія, дальше пройде звиджаня граду Шариш і выізд до Пряшова. В Пряшові буде мож видіти собор з гробницями, в котрых спочыват м.ін. Александер Духнович і архієпископскій палац. Окрем того буде звиджаня старого міста і семінариі. Кошт поломничества то 140 зл од особы. Деталі глядайте на сайті грекокатолицкой парохіі в Розділю.