Сумар дня на 1. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 1. грудня/децембра 2023 р.

Ден Русинів Польщы

Уж заран, в суботу 2. грудня/децембра будут проходити центральны святкуваня нашого нацийонального свята – Дня Русинів Польщы. Каждого рока 5. грудня/децембра празднуєме наше нацийональне свято для упамятніня віче во Фльоринці в 1918 році, якє пак дало початок Рускій Народній Республиці Лемків. Того рока одзначыме тото лемківскє свято в суботу 2. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці. О 14.30 год. упамятниме 105. річницю віче во Фльоринці в долинці при грекокатолицкій церкви. Дальше, як каждого рока, споминовы подіі будут проходити в Рускій Бурсі в Ґорлицях. Од 16.00 год. буде там проходила стріча, в рамках котрой буде мож м.ін. выслухати доповід Міляна Яна Піліпа о русиньскій нацийональній символиці. Артистично подію дополнит выступ діючого при Рускій Бурсі ансамблю Терочка. Просиме до спільного святкуваня!

Образ Лемковины в сучасній штуці

В пятницю 8. грудня/децембра о 18.00 год. одбуде ся вернісаж часовой выставы в Етноцентрі Коросняньской Землі пн. «Внутрішній і зовнишній простір. Образ Лемковины в сучасній штуці» Вступне дармо. Куратором выставы єст Михал Шымко. Як заявлят, лемківска штука не находит ся в колекцях польскых музеів і не была дотля вказувана в так шырокій перспективі. Буде то выстава сучасной штукы – лемківкой і польской (інспіруваной Лемковином). Выстава буде одкрыта до 28. січня/януара будучого рока.

41. Головне засіданя Братства Православной Молодежы в Польщы

Заран, в суботу 2. грудня/децембра в Щеціні буде проходило 41. Головне засіданя Братства Православной Молодежы в Польщы. Возме в ним участ 140 делеґатів, в тым репрезентациі парохіяльных братств, єпархіяльны заряды і іх духовы опікуны з цілой державы. Подія офіцияльно зачне ся архієрейском Літургійом в церкви св. Миколая в Щеціні. Літургію буде очелювал архієпископ вроцлавско-щеціньскій Юрий. Дальше засіданя буде проходило в сесийній сали щеціньского Ураду Міста.

В Креници выремонтували сім улиц

Як поінформувал бургомайстер Крениці Пьотр Рыба, завдякы дофінансуваню з Урядового Фонду Розвитку Доріг повело ся выремонтувати понад 600 метрів дорогы на улици Еберса. Додатково вымінене было освітліня. В тым році то уж сема змодернізувана улиця в Креници, по ул. Парк Спортовый, Зеленій, Чальній, Зьрудляній «Дорозі на Огороды», ал. Никыфора та доіздовій дорогі до Уряду Міста од ул. Еберса.

Ремонт желізницьового переізду в Польковицях

Як сме інформували в минулый віторок, вчера мали рушыти ремонтовы працы при желізницьовым переізді при улици Фабричній в Польковицях. В звязку з ремонтом переізд мал быти цілковито закрытый до 2. грудня/децембра. Пляны были єднак змінены з огляду на актуальны атмосферичны условія. Ґенеральный выконавця торовых робіт піднял рішыня о стриманю прац высокодайныма желізничныма машынами, а што за тым іде – о пересуніню терміну першого закрытя желіничного переізду на ул. Фабричній в Польковицях на пізнійшый термін. Буде він поданый в дальшым часі. Направа переізду єст конечна і нашмарена проведіньом етапу ленійовых робіт в рамках реализуваной задачы модернізациі желізницьовых леній 971 і 971а медже Любіном і Польковицями.